Hnahlanin lawmman dawn an lawm

Hnahlan khua chuan April 14, 2023 khan an khaw community hall-ah Mizoram sorkarin Outlook Tech Summit & Swaraj Award for Outstanding in NE State in Agriculture 2022 leh Good Governance Index, Agriculture and Allied Sector in Hill States 2021 a pakhatna an nih an lawm a, Agriculture minister C Lalrinsanga'n a hmanpui.

C Lalrinsanga chuan, Hnahlan khawtlangin lawmman an dawn chu an thawhhona leh inlungrualna vang a nih thu a sawi a, "Lailiphaiah buh leh thlai chìn nana ram chei ṭhat hna (land development scheme) kalpui zel tum a ni a, a zuitu pawimawh tak tuikawngte a ṭul ang zela ngaihtuah tum a ni. A theihna apiangah ram tihhmasawn leh eng lai pawha kal theihna kawng siam tura hmalak tum a ni," a ti.

Leilung hânnate'n thlai leh thei thar hmel lan dan leh tui danah nghawng a neih thu sawiin Minister chuan, "Thlaiin leilung a ei dâk tawh tih ṭhat leh nan thiamna hmanga leiṭha siamna kalpui mek a ni a, leiṭha siamte district tinah enchhinna nei tura tih niin, a result ngaihchan mek a ni," a ti a, buh leh thlaia intodelh turin theihtawp chhuah a pawimawh thu a sawi.

Bialtu MLA Dr ZR Thiamsanga pawhin thu sawiin, sorkarin grape wine inkaihhruaina thar a siam chu grape chínga eizawngtute tan thil lawmawm tak niin a sawi a, "SASCI kaltlangin ka bial chhunga inkalpawhnate changtlung zawka siam chhoh zel tum a ni a, Hnahlan khuaah police station dah a nih theih nan chak taka hmalak mek a ni," a ti.

Inkhawm hi Hnahlan VC president Lalremruata Cherput-in a kaihruai a; Irrigation and Water Resources chief engineer Lalrotluanga, Agriculture joint director Lalmalsawma, Mission Organic Mizoram state coordinator Lalnunpuii Parte, Champhai bawrhsap James Lalrinchhana leh mi pawimawh dangte an tel a ni.

Thu lakna: Vanglaini