Mizorama Grape larpuitu khua Hnahlan Winery chuan Grape aṭanga Wine an siam chu kumin November thla velah chuan a duh apiang lei theiha hralh theih an beisei.
Zalen palaiin Hnahlan Grape Growers Society hruaitute hnen aṭanga thu a dawn danin hun hmasa lama an lo siamchhuah ‘Zawlaidi’ aia ṭha Fortified Wine siamchhuah an tum tih an sawi a. Wine an siamchhuah turah chuan ENA hmang tawh lovin Wine siamna ṭha chi hmangin siam an tum tih sawiin hemi atan hian India chhim lama Grape sawngbawlna hmuna hun engemaw chen training lo nei tawh chu Consultant atan an ruai mek tih an sawi. Wine an siam tur chu khawvelah pawha zahpuiawm lo tak tur a ni tiin an siam phawt loh chuan a man (rate) tur an la hre thei lo niin an sawi bawk.
Hnahlan Winery hian kumin hian Grape rah quintal 400 chuang an lei tawh a, Grape hi kg-ah ₹ 40 zela leiin a man hi an pe nghal zel a ni. Winery hian an duhkhawp lei tur an nei lova, Hnahlan bakah khaw ṭhenawma mite ta pawh eng emaw zat an lei a ni.
- Maneiha Bochung
Source: Zalen Weekly Newspaper