Zawlaidi siamna hmunpui ni ṭhin Hnahlan Winery chuan kar kalta khan Grape a khawn leh ṭan a, sorkarin a phal veleh a hma aia Wine 'ṭha leh hrisel zawk' siam chhuah a tum.
KUM 2016 aṭanga chawl tawh Hnahlan Winery chu Wine siamchhuak leh turin a inbuatsaih mek a, tunah hian sorkar aṭangin Wine siamchhuak leh turin phalna an dil mek.
Tun hmaa Zawlaidi an siamchhuah aia ṭha zawk leh mihring in atana hrisel ṭha zawka siam chhuak turin Winery thuneitute chu an inbuatsaih mek a. Grape pawh a chingtute hnen aṭangin dah vawhna (Cold Storage)-a dahkhawl sen loh dawn an leikhawm leh tawh a, Wine siamchhuah an tum chu Food Safety Standard Authority India (FSSAI) pawmpuia siam an tum thu TFD an hrilh.
Kum 2015 March thla atanga tualchhunga dan hnuaia zu zawrh a nih aṭang khan Hnahlan Winery tlakchhiat pui khawpin ‘Zawlaidi’ hralh a kal lo nghal a. Hnahlan Grape Growers’ Society (HGGS) Secretary Laltlankima Fanai chuan Wine hralh a kal loh chuan Grape chingtute’n an hralh thei lo nghal niin a sawi a.
“Kan harsatna tawh chu MLPC Act hman vang kha a ni ber! Zu a awm tak avangin Wine hralh a kal ta lo a, kan hralh theih loh avangin loan kan lak kan rul thei ta lo. Grape kan leisakte pawisa kan pe thei lo. Congress sorkar tawp lam khan theihtawp min chhuahpui a, sorkar tharin sorkar laipuiah hma min lakpui bawk a. Market Intervention Scheme (MIS) hnuaiah hma kan la a, kan ba te kan tlak thei a; loan kan lakte pawh kan rul thei.” a ti.
HGGS hruaitu pakhat chuan Grape chin chu khawtlang eizawnna innghahna a nih avangin Grape hralh theih loh chuan tlangram lo neiha kir leh a ngai niin a sawi a. “Grape huan la enkawl hram hram pawh an awm. Chung mite ta chu kan lei a, tunah Winery tih thar leh kan tum rilruk avangin Grape ching thar lehte pawh an awm. Lo neiha buh chin ngawt ai chuan Grape chin a, kg khat cheng 40-a hralh kha an duh zawk. In 730 vel awmna khuaah kum 2014 vel thleng khan chhungkua zaa 80 velin Grape an ching a, heng hunlai hian tlangram lo neia eizawng chu chhungkaw 30 vel chauh an ni.
“Tunah hian chhungkaw 500 velin tlangram lo neih an tharthawh leh a. Buh, Hmarcha leh Sawhthing an ching deuh ber. An leilette an chei thar leh a. Mahse, Winery kan tharthawh lehte chuan Grape ching-in an kir leh duh a rinawm.” a ti ve bawk.
Laltlankima chuan Winery an tih thar leh chuan tlangram lo neih aṭangin Grape chinah an kir leh duh a rin thu a sawi ve bawk a, “Grape hian kan social life a nghawng nasa khawp. Tunlai hian leilet leh ram lama hnathawk bakah kudam-ah ṭhalai an thawk nasa a, ṭhalai awm mai mai an awm lo. HGGS-in Grape kan la leh chiah chu kudam-in buhfai unload tura chhawr tur ṭhalai an hmu tawh lo, hnaṭau a ṭet leh e. NLUP aṭang khan kan inzirchiang tawh a, NLUP-ah khan Grape chin Trade-a thlang an tam a. Mahse, cheng nuai chuang an dawn avang khan an hlawk phah lo. Kuthnathawktute a thlawna sum pe lo khan an thar chhuah hralhna tur lam ngaihtuah zawk se kuthnathawktute chu an hlawk zawk ang!” a ti.
HNAHLAN Winery hi kum 2010-a ṭan niin kum 2015 vel thleng chu tluang takin a kal hman a. Mahse, kum 2016 vel atang khan an Wine tharchhuahte an hralh theih tak loh avangin an chawl a; an chawlh rei tawh avangin an licence a thi hman. Tunah hian licence tinung leh turin sorkar-ah hma an la mek.
Wine siamchhuah phalna an neih theih chuan hmathlir pawh thui tak an nei niin Laltlankima chuan TFD a hrilh a.
“Zawlaidi kha Isabella Variety a ni a, Bangalore Blue ti pawha sawi a ni. Tunah hian a Variety kan thlak thei lo, a ṭhat dan (Quality) erawh kan thlak thei. Quality thlak tur hian All India Wine Producer Association lam pawh hmaichhanah kan be tawh. Kan lo kalpui tawh dan te, harsatna kan tawh dante kan hrilh a; hmathar lak kan tum dan kan hrilh chuan a ti phur ve hle.
“Mahse, Grape chingtu an tlem tawh vang erawh chuan Grape a tam thei dawn lo a; an hnena zir chhuak Mizo nula min kawhhmuh angin kan chahchhuak a. Ani ho hian theihtawp chhuah kan tum. Zawlaidi siam kan tum lo a, Wine Quality ṭha zawk (Premier Wine, a um ang chi kha) India rama Wine siamtu liante siam ang leh khawvel ram danga Wine siam chhuak ramte siam anga siam kan tum. Bottle kan la order lo. Mahse, mi hip thei turin ruahmanna chu kan siam. FSSAI lam pawh berawnin, an pawmpui thlapa tih kan duh. Hralh kal theih dan tur bera tih kan tum.” a ti.
WINE siam phalna an la neih loh avangin an la siam thei lo a. Alcohol Content tur pawh an la hriat loh thu HGGS Secretary chuan a sawi. Wine Rules tharah engtin nge an tih dawn tih an la hriat loh thu sawiin, “Kg khat ₹ 40-in kan leisak a, Wine siam phalna kan la neih loh avangin Cold Storage-ah kan dah. Winer Rules thar sorkar-in a duan mekah engtin nge an tih dawn aw kan ti a, Alcohol Content chu a san ka ring lo, 8 – 10% inkar vel a nih hmel.
“Zawlaidi ang kha chu kalsan kan tum. Winery-a Tanky te pawh ṭha zawkin kan chei ṭha a, Degree vawng ṭha thei te pawha tih kan tum. Kan Cold Storage-ah hian Quintal 300 vel a dah ṭhat theih a, tunkar atang hian her ṭan kan tum a, Grape chu kan lei chhunzawm zel ang,” a ti.
CHAMPHAI Grape Grower’s Society (CGGS) pawhin tunah hian Grape chingtute atangin Grape an leisak leh mek a, anni erawh kum 2010 aṭanga Wine an siamchhuah chu chawl lovin an la kalpui reng a, Zawlaidi tih erawh kum 2015 aṭang khan Champwine (Champhai Wine) tia hming thlakin an la kalpui a, a um pawh an ti danglam deuh.
July 18 aṭang khan Tlangsam Winery-ah Wine siamna turin Champhai leh a chhehvela Grape chingtute thar chhuah Grape an leisak thar leh a, Grape hi kg khat ₹ 50-in an leisak.
Champhai Grape Growers Society hi kum 2007-a din niin tunah hian member 148 an awm mek. Grape sawrna khawl, Winery hi kum 2010 July 16 khan hman theih tura peihfela hawn a ni a, Quintal 2,000 dawngin kum 2015 khan Grape Quintal 1,682 sawrin tun thlenga an sawr tam ber kum a la ni.
Nikum chhung khan Quintal 729 an sawr a, Wine hi a hlawmin kum 2018 thleng khan M/s Radiant Manufacturers Pvt Ltd-in a la ṭhin a. Mahse, MOU an sign a tawp tak avangin Wine hi an hralh tawh rih lo. Baptist Church Mizoram (BCM) chuan Sacramental Wine tur an siam tir. Mizoram chhungah Champwine leh Zowine an zuar chhuak bawk.
HETIH lai hian, kum 2010 vel khan Regional Institute of Para-Medical & Nursing Sciences (RIPANS) chuan Hnahlan Winery leh Tlangsam Winery-te Wine siam chhuah Zawlaidi a endik tawh a, Wine-a Tartaric Acid chu a tam deuh hlek niin an hmu a, an endikna leh rawtna an neihte sorkar-ah an thlen.
Mahse, hemi hun laia an endikna chu Media-ah a chhuah dan a dik loh deuh avangin Zawlaidi chu heng hunlai hian mipuiin an thinhrik deuh a, Winery neitute pawhin RIPANS chu court-a khin hial an tum hman.
RIPANS-a Pharmacy Department hotupa, Dr H Lalhlenmawia chuan, “A him lovin kan hmu a ni lo a, min zawt miah lovin [media te’n] an ngaihdanin an lo sawi (interpret) a. Keini kan lawm em em a, Media-ah a chhuak a. Anni (Hnahlan leh Champhai) an lawm lo em em a. Tartaric Acid kan tih ber kha a tam kan ti a ni mai a. Kan report pawh sorkar-ah kan thehlut a, Tartaric Acid pawh titlem deuh turin rawtna kan thlen.
“Grape ching ṭhin ram lumah chuan an Grape a thlum a, Wine Quality a sang a, ram vawtah Grape kan ching a, a thur a, sugar a pai tlem a, Tartaric a sang a. Tartaric hi tun hma kawṭhuahna hlo atana kan hman Sodium Tartarate kha Tartaric Acid hi a nia.
“Tartaric Acid pawh kha mihringah a thawh dan a inang lo. Khawṭhatloh pui an awm ang a, engahmah thawk lo pawh an awm ang. A hlauhawm kan ti lo a, Tartaric Acid a sang kan ti ringawt a ni. An vawi khat tihnaa Tartaric Acid chauh sawisel tur kan nei kha kan lawmpui a, chawimawi tlak an ni hial asin. Kan report kha [media te’n] an duh duhin an interpret a, thil hlauhawm a ni lo,” a ti.
[Additional reporting: Jacob Lalnunhlima]
Source: THE FRONTIER DESPATCH