Zu zawrh khapin zangkhua a bungbut tir leh beiseitu, Ṭiau kama grep chingtute intuaithar fe tawh; sorkarin Mizoram Liquor Prohibition Rules peihfel thawkhat, thla tharah Council of Ministers rel atan pharh hman tum.
Mizoramah dan anga zu zawrh phal a nih lai, tualchhunga grep hmanga siam uain hralhna a chuai ṭantirh khan Hnahlana grep thar tam ber C Lalrampara chu Aizawla Millenium Centre-ah a kal a. Chumi ni chuan ruah a sur nasa hle nachungin, Ṭiau kama cheng loneitu chuan mak ti tak maiin khaw chhe hnuaia wine shop kawta mi ṭhahnem tak, a hmei a pa an lo intlar put mai chu a thlir a.
“Pa upa lam deuh pawh kha wine shop kawtah ruah sur hnuaiah an intlar peih tho mai a. Sap zu hi chu kan duh a ni,” tiin C Lalrampara chuan khami ṭuma a thil hmuh chu kumin July thla tawp khan Hnahlana a grep huan pakhat zawk, mual eng emaw zatin bawhthuah zau tak, a chhung khawilai aṭang maha hmuh kim phak loh chhunga a thlam kawta ṭhu chungin a sawi a. A thlam chu khawi lam lamah pawh grep zamin a hual khat vek a. Tlak lamah phei chuan pal anga zam tun tir ni lo, chhun ni hliah zawnga zam bawh tir, a nupui Zokhumi’n ‘pandal’ a tih mai chu hmuh phak chin zawng ruam lamah a inzar pharh thla a.
Ama’rawhchu, ral lehlamah erawh grep zam karah Zawngṭah kung a ding thluah a, chu chuan grep uain tlakchhiat laia an chhungkaw mangan lai thlir let tirin, "Zawngṭah saw, kung khatah ₹ 27,000 chuang kan lei thei a, grep thlakna tha ber a ni ang ka ti a, ka phun a nih saw!" a ti a.
A titi chuan chhungkuaa uain an um ṭhin dan te, Mizoram chhimlam thlenga an hralh theih ṭhin dan te leh kum 10 chuang liamtaa an grep rah rampum huapa hriat hlawh Zawlaidi herna winery-a an hralh ṭhin dan lam a hawi a. Mahse, a sawi lai mek chuan titi kawng dang zawh thutin, “Sorkarin zu a zawrh lai khan kan tlachhe rawih rawih a. Grep rah leh kan um ve chhunte chu ṭhenawmpa kan inṭheh ta mai mai alawm!" a ti a. Zu khap, phal ṭhen, phal leh khap lehna dan Mizoramah a awm nuk tawh a, a hnuhnung ber leh hman mek chu nikum March 30-a Assembly-in 'The Mizoram Liquor Prohibition Bill 2019’ a pawm kha a ni a. State anih hnua Mizorama zu khapna dan lar ber leh hman rei ber (kum 18) chu Mizoram Liquor Total Prohibition Act, 1995 kha a ni thung. Kha zu khap burna dan kha kum 2007 khan siamṭhat niin, siamṭhatna puluttu, khatih laia Excise Minister Dr. C Lalzama khan Mizoram chhuahlamah loneitute'n anmahni remhriatnain grep an chin nasat thu leh grep tui sawr chu thianghlim zawk a siam a nih theih a, a chingtuten eizawnna mumal tak an neih phah theih nan uain siam, hralh leh in phal a, zu khapna dan siamṭhat a ṭul thu Assembly a hrilh a.
Grep hi Champhaiah chin hmasak niin, a tirah chuan uain-ah siam a ni ngai lo va. Mahse, Mizoramin zu khapna dan a siam hma kum, kum 1994 khan Hnahlan pa H Thanzama'n a thlai chin te leh a ran vulhte a vanneih pui theih loh lutuk avangin Champhaia grep chi a la a, a ramah a ching ve ta ngawt mai a. A rin ai daihin a ṭha duh a, kum hnih lekah quintal hnih a thar a, kum hnih dang a liam leh chuan quintal sarih lai a thar ta a.
A grep thar chu Aizawl bazarah-te hralh tum mah se, hralh a tlak vak loh avangin uain siam nan a hmang chhin a. Hralh a tla ta em em a, chuta ṭang chuan grep chin chu khawchhak tlangdung, a bikin Hnahlan leh Champhai leh a chhehvelah te a hluar ṭan a ni ta der mai a. Khawmite chuan sintex barrel-ah chini nen an um ta sup sup a, mahni remhriat ang zelin hmun hrang hrangah an hralh ta zel a. C Lalrampara te chhung pawhin heng hunlai hian uain siam leh hralh chu luhchilhin, Siaha leh Lawngtlai thlengin hralhna an hmu ta zel a.
Dr C Lalzama’n zu khapna dan siamṭhatna House-a a put luh hma, kum 2005 daih tawh khan Horticulture Department chuan Hnahlanah hian Grape Festival-te buatsaihin, khawmite chuan Hnahlan khaw hmarlama Assam Rifles sipaite pawh uain tem tura mi ina an lenluh thu sawi turte an la hre nawk nghe nghe.
Grep chin leh thar zat hi zu khapna danin a hril ṭhin hle a. Sorkar chhinchhiah dan chuan, zu khapna dan uain tan bika thlah dul a nih aṭang khan Mizoramah grep chinna hmun zau sawt sawtin, thar zat pawh a pung chak hie a. Zu zawrh phal a nih atang erawhin a tlahniam leh dawk a, khap a ni leh chiah a, a sang leh a. Sorkar chhinchhiah dan chuan, MLTP dan tihdanglam hnu deuh mai, Hnahlana winery-a grep sawr ṭan kum, kum 2009-10 khan state pumah hectare 720-a zauah grep chin niin, Metric Ton (MT) 4,990 thar a ni a. A kum leha Champhaia winery-a grep sawr a nih ṭan leh khan hectare 800-a zauah grep chin ni tawhin, MT 6,750 an thar a. Zu khap a nih a, uain erawh phal a nihl ai khan grep chinna hmun zau zawng leh thar zat hi pung zelin, zu zawrh phal a nih ṭan kum, kum 2014-15 khan a thar zat chuan a vawrtawp a thleng a, MT 26,500 thar a ni a. Mahse, zu zawrh chuan tual chhung uain hralhna a nghawng nia ngaih theihin, kum 2016-17 khan grep thar chu MT 18,000-ah a tla nghal a, a kumlehah phei chuan MT 8,185 chauh thar a ni tawh.
Hetih lai hian, kum 2018 Krismas vuakveta Council of Ministers tharin chawp leh chilha sorkar zu zawrh a tih tawp a, thla khat dawn lai dry day inzawm a puan a, wine shop-te an inhawn mumal chhunzawm theih loh hun a thlen tak vang khan nge chu sawi fak a har nain, kum 2018-19 khan grep thar zat hi a pung leh dawrh a, sorkar chuan MT 16,500 emaw lai thar a ni leh nghal niin a chhinchhiah.
Grep heti zat tharchhuah a nih leh tawh a, MLA te’n grep rah lakkhawm hlim winery-a her ṭanna hun te an hman pui a, Minister-te society general body meeting-ah khualliana an ṭan a, sorkar thuchhuak ngeiin “Mizoram chhungah” uain zawrh chhuah a nih thute a tarlan avangin a nileng lo tan chuan MLP dan hnuaiah ziak loh danin grep hmanga uain siamte hi ngaihnathiamna thui tak a awm tih chu a hriat thiam theih mai a. Ama’rawhchuchutiang dinhmuna din reng erawh winery enkawltute chuan himin an hre lo va, dan mitah chuan Aizawl daia zu bilh thinte nen an danglam hran lo niin an sawi thung. Eng vang tehreng nge ni, zu khapna dan awm tawh pahnihte chu state rorelna sang berin a pawm leh hman ṭan a nih inkarah kum a liam hman ve ve a. The Mizoram Liquor Total Prohibition Act kha kum 1995-ah pawm ni mah se, kum 1997-ah hman tan a ni a. Chutiang bawkin nikuma pawm MLP Act pawh hman ni fo tawhin, Police leh a dan neitu Excise lam pawhin thubuai siam nan hmang fo bawk mah se, a kenkawhna tur ‘rules’ chu vawiin thlengin sorkarin hman theihin ala ti chhuak lo a.
Hetih lai hian, MLP Rules hi siam turn a ni lo a tih theih loh thung: MLP Act pawm
a nih atanga thla kuanaah December 19 khan sorkar chuan The Mizoram Liquor Prohibition Rules 2019 chu notification hmangin a tlangzarh a. Mahse, hei hi Assembly-a pharh emaw, official gazette-a tih chhuah emaw a nih hmain kumin January 7 khan tual chhung chanchinbu pakhatah tarlan niin, thupuia “Phalna nen beer leh wine siam theih a ni; Hun bik atan rakzu siam leh zawrh a theih” chanchinthar ziakah chuan “mipui vantlang hriatsual palh awm thei” a awm anga ngaiin chanchinbu thuziak hi Excise and Narcotics Department chuan sawifiahnain a ni la lain a umzui a. A tukah Excise thuneitute’n journalist-te kawmin an sawifiah chhunzawm leh bawk a.
Excise thuneitute chuan rules hian “country liquor" tih thumal hmang bawk mah se, rakzu tin zawn lo vin, Champhai leh Hnahlana winery leh Sakawrtuichhu- na beer brewery te leh kut nikhuaa Mizo zu pholan ṭhin, zu fang leh zu pui ang chite a tinzawn zawk niin an sawi a.
Ama’rawhchu, chanchinbua he thu a chhuah aṭanga chawlhkar thum emaw velah MLP Rules hi Council of Ministers ṭhukhawm ngaihtuah atan chhawp chhuah ni mah se, hun danga ngaihtuah leh turin dah a ni a, ‘rules’ tel lo vin MLP Act chu kenkawh lailawk a ni ta char char rih a ni. Hetih mek lai hian, tunhnaiah MLP Rules thar chu Excise and Narcotics Department-in duang lehin, tunah hian Law and Judicial Department-ah ‘vet’ atan a awm mek niin KT Beicho (IRAS), Commissioner and Secretary, Excise and Narcotics Department chuan a sawi a.
TFD thu dawn dan chuan, MLP rules thar hian nikum December-a rules notify tawh, hman leh tak si loh aiin a huam zim zawk a. Zu fang leh zu pui, kut nikhuaa siam pawh phal lovin, kum tamtak sorkarin hma a lo lak pui tawh leh kuthnathawkte intelkhawmna society anga ding tawh sa, winery nei sa tawh ang te chauh uain siam leh hralh phalna pek a turn a. Rules thar hi pawm a nih chuan anni hian licence te an dil thei ang a, an thilsiam zuar chhawng turte’n an dil thei bawk ang a. Chutih rual chuan, an thilsiam a him leh him loh endikna erawh an hralh chhuah hmain an paltlang a ngai thung ang a, "sacrament emaw, 'beverage’ emaw anga a hrana thliar a theih ang.
Tin, MLPC Act hunlai angin a hmuna uain inna tur hmunte phalna pek tumna a awm lem lo va, eichawp ang deuha dawr a lei a, khai haw mai theih tur ang chauha zawrh rules chuan a phal ang, TFD thu dawnna chuan a ti a.
Department thuneitute ruahman dan chuan, Law and Judicial Department-in a ‘vet’ hman chuan November thlaa Council of Ministers thukhawm hmaah pharh leh tum a ni. Thuneitu pakhat chuan, Council of Ministers thu thu a ni tawh mai.” a ti. Hetianga state sorkarin politics boruak rit tak kara hma a lak bek bek lai hian Union Ministry-a thuneitute, Indian Service Association (IAS) officer zinga Mizote fak hlawh fo tawh ṭhinte leh ram pum huap uain sumdawnna pawl thuneitute beiseina mit nen Mizoram hmarchhak, Ṭiau kama grep chingtute hi kum eng emaw zat an lo thlir reng tawh a. Anni hmalakpuina zarah zu zawrh khapin zangkhua a bungbut tir leh beiseiin grep chingtute hi an lo intuaithar fe tawh a ni.
---(chhunzawm tur)---
Edited By: Hmingtea Sailo
THE FRONTIER DESPATCH - OCTOBER 19, 2020