Pi Zorampari, Hnahlan Darnam chu hun eng emaw chen Hnahlana an awm hnuin bawrhsawmna in a tlakbuak a, an khawsak harsa chho zelin in luah tur chungchangah harsatna an nei tih report dawn a ni a.
He thu hi hriat a nih ve leh Joint YMA chuan an chungchang ngaihtuah nghalin an in tur sak nghal ni se tiin a rel a. Joint YMA hian in sakna daih sum a neih loh avangin khaw chhung in tinah vehbur khawn ni se tiin Branch pahniha Section-ten ni 4-6 January, 2021 chhung khan vehbur a khawn ta a. Hetah hian pawisa fai ṭhahnem tak leh insakna hmanrua chi hrang hrang hmuh a ni. Ex-MLA Pu TT Zothansangan ₹ 3000 thawh nghalin kan MLA Dr. ZR Thiamsangan a chung rangva bundle 5, rigging leh tuidawn leh rangva perekte a tum bawk a. Chhungkua, mimal bakah ṭhianho Club ang tein ṭanpuina a lut zel a. Hemi ṭuma vehbur khawn aṭanga hmuh hi hetiang hi a ni:
Pawisa fai: ₹65400
Rangva bundel: 5 (Bialtu MLA)
Banbul: 17
Charchar: 43
Chartin: 55
Thingphel:19
Buhfai: Kg 55
Buh : Ṭin 3
Heng bakah hian insakna bungrua eng eng emaw a awm nual bawk.
Ni nga chhunga sak zawh tâk Pi Zorampari in hi Ni 9.1.2021-ah sak ṭan niin ni 14.1.2021-ah zawh fel a ni a. A zau zawng Ft. 28×16 niin a chung rangva, a bang tile, a chhuat thingphela sak a ni. Pu Kawlliana, Hnahlan Darnam chuan a in hmun a sahthlak a ni.
Pi Zorampari In sak chhung hian hnatlang tha 131 zet a lût a, sum leh pai leh tha leh zung sêng zawng zawng chungah Joint YMA chuan lawmthu a sawi mawlh mawlh a, an awmna Chhim Veng Branch A-Section chuan pa chan changin nasa takin hma an la bawk.
In saknaa sum hmuh ₹ 65400-ah ₹ 42760 hmanral a ni a, hman bang ₹ 23640 hi Pi Zorampari te nufa kutah Ni 15.1.2021 zingah Buhfai leh nepnawi eng eng emaw nen Joint YMA OB-ten an hlan.