Hnahlan khua hi Mizoram khaw chhak Aizawl atanga km 230 vela hlaa awm a ni, kum 1966 khan in 206 an ni. Lower Primary School 1 sawrkar enkawl a awm a, Middle School 1 grand- in -aid a awm a, High School 1 private a awm bawk. Agriculture Department hnuaia Gramsevak thuthmun a ni. Helth Department hnuaiah Nurse leh Doctor pakhat an awm a. Dak lamah chuan dakpu pakhat a awm a, ani hian Hnahlan khuaa dak lo thleng chu a sem thin a ni. Sawrkar hnathawk tlemte tih loh chu loneia eizawng an ni.
1st Assam Rifle Platoon khatin an thuta, Platoon Commander hi Jemadar Ganga Bahadur Chhetri a ni a. Assam Rifle barrack thlang chhuah lamah family lane a awm a, chhungkaw sawm an awm a, Mizo chhungkua 4, Pu KC Lalmuana Pharmacist, Pu Lalsanga WT Operator, Seikunga 2 inchis Mortar Gunner leh Pu Thangdailova te an awm a. Family lane hi sipai awmna hung pawna awm a ni. Family lane thlangah hian tuikhur a awm a, chu tuikhur chu sipai ho hian an chawi thin a ni.
Hnahlan khuaah hian Kohhran pathum Presbyterian, Salvation army leh UPC an awm a, Presbyterian an lian bera, Salvation Army leh UPC hi an tam lo hle ve ve a ni.
Tunhma chuan Hnahlan khuaah hian Hmar hnam chi khat Hnahkal hnam an awm thin a, khaw hming pawh Hnahkal an ti thin niin an sawi. Hnahkal ho chu Sailo Lal hlauin an insawn ta a, an khaw hmunah chuan Sailo Lal an awm taa, " Hnahkal ho kan luahlan a lawm," tiin Hnahlan an ti ta niin an sawi.
Hnahlana MNF Unit President chu Pu Keiliana a ni a, MNV hruaitute chu Pu Liankhuma, Pu Chhingzuala leh Pu Hrangkima te an ni. Hnahlan khaw thutchilhtu Assam Rifle ho chu silai nena beiha lak tur a ni tih chu an hria a, a beih hun tur thuah chuan Eastern Command Hqs thu an nghak a ni.
Ni 3.3.66 tlaiah Ngur khua atanga volunteer rawn kal ten MNF Unit President Pu Keiliana hnenah lehkha an pe a, lehkhaah chuan Hnahlan Assam Rifle post bei tura Major Darhmingthanga leh a hote an rawn kal tur thu leh a beih dan tur lo ruahman pui tur an nih thu a in ziak a. Pu Keiliana chuan MNV hruaitute hnenah a hrilh nghal vat a. Ni 3.3.66 zan chuan Hnahlan khuaa Assam Rifle beih dan tur ngaihtuah in an kal khawma, Assam Rifle post chu hual nise, Assam Rifle awmna piah chhim lam tlang Assam Rifle awmna aia sang zawk atanga chhuk kah nise, an tui tlan thin Family lane thlang tuikhur bula chana, tuichawi ngam lova siam ni bawk se, Assam Rifle Camp hmarchhak lam khaw tlangah Assam Rifle ho chet dan enthlak reng ni bawk se an ti a. Khaw tlang hi Assam Rifle awm tlang chen vela sang a ni. Major Darhmingthanga ho chu Pu Keiliana leh Pu Zakawpa ten lo hmuak se an ti a, zan dar 12:00 rik dawnah an meeting chu an banga. A tuk ni 4.3 66 tukthuan eikham hnuah Pu Keiliana leh Pu Zakawpa te chu Major Darhmingthanga te hmuak turin an kal ta a.
Kum 1966 February thla tawp dawn lamah chuan 'M' ( Mualzavata) Battalion chu a tul huna che nghal thei tura hrilh an nih avangin an inpuahchah sauh sauh a, Sialhawk khaw MNV Commander Capt Kapchhunga ( tun hnua Maj Kapchhunga ti a hriat lar tak kha) chuan Warrant Officer 11 Ngurbiakvela Vanzau khuaa lehkhazir chu a ko haw a, an khua a thlen zan chuan an khuaa silai ( local arms) awm zawng zawng an khawm nghal a, hetih rual hian khaw danga mite pawhin an khuaa silai awm an la khawm bawka. Ni 27-2-66 ni chuan Biate khaw chhehvel khuaa volunteer te chuan M Battalion Hqrs Biate khua an pan khawm a, Biate an thlen chuan Maj Darhmingthanga n "Champhai pana kal nghal tur" a ti a. Khaw hrang hrang Sialhawk, Khawhai, Tlangpui, Chalrang leh a hmunthu Biate atanga volunteer kal khawm mi 300 rual chuan Maj Darhmingthanga hovin Champhai an pan ta a, kal zinga mi thenkhat hming tarlang ila: Major Darhmingthanga Biate, Capt Lalthanga Biate, Capt Rualkhuma Biate, Lt Lallawma Khawhai, Capt Kapchhunga Sialhawk, W.O 11 Ngurbiakvela Sialhawk, Sgt Chawngsiama Biate, Ramtharnghaka Khawhai leh a nau Chanchinmawia (L). Kal zingah hian Chanchinmawia a naupang ber a, kum 14 hmel a hmu tan dawn chauh a ni.
Biate khua atang chuan hmanhmawh em em, kal pangngaia kal pawh awm lovin a tlanin an tlana, an tlan tlaivar zak a, khawvar tirhah Champhai leilet an thleng a, leilet a mi ten Champhai Sipai an lak vek thu an lo hrilh a, an hah a dam sawng sawng a, an hmanhmawh chhan ber Champhai vai sipai post lak chu an thian ten an lo lak fel tawh a vangin an chawla, thingpui an in a, hmanhmawh lo in Champhaiah an chho a. Champhaiah March ni 1 leh ni 2 an cham a, East Command Headquarters in Hnahlan khuaa Assam Rifle bei turin a tir a. Biate khua atanga M Bn kal zinga 100 Champhaiah an cham bang a, Hnahlan pan thei chu 200 emaw chauh an ni ta a. LMG-1, Stengun-2, 303 Rifle-10, Very Light Pistol-1 leh local arms engemaw zat an keng a, Major Darhmingthanga hovin ni 3-3-66 tlaiah Hnahlan panin an chhuak ta a.
M BN IN HNAHLAN AN PAN
"Zan thla eng hnuaiah kan inzui tham tham a, far hnah thliin a chhem rik seng seng tih loh chu thawm dang hriat tur a awm lova, in auh lauh lauh a remchan loh avangin kut in kan in hui a, zaizirin kan in bia a ni deuh ber mai a. A pawnlang kan ti dawn nge a phawvuakah chuan hlimawm awm viauin lang mahse, ral kap tur kan nih avangin chhungrilah chuan thin a phu ru a, a chhe ber han dawn phei chuan rilru in ngaihtuah loh loh tur a ngaihtuah a, ram chhana thih ai chuan ram chhana dam a thlanawm zawk daih a. Ram chhana hliam tawrh ai chuan ram chhana hliam tawrh loh a thlan awm zawk bawk a. Sap hla pakhat For me to live is Christ die in is gain ' Nun chu Christa tan a ni a, thih pawh hlawkna a ni,' tih hla phei chu a sak han sak chi ni in ka hre lo. Kan kal zela kan chauh deuh hnu chuan kawng sirah rei vaklo kan thu mu a, khawvar hnuah kan kal leh ta a.
Vapar khua kan luh hma in ral atangin Vapar khaw mipuiin min hmu a lo ni a, vai sipai emaw min ti a, daiah an biru bo vek mai a, khua kan han thlen chuan tu mah an lo awm lova, 'Mizo sipai kan ni e, kan hlauhawm loh, khuaah rawn chhuak rawh u," tiin kan au a, an rawn chhuak a. Tukthuan min ngaihtuah sak turin kan ti a, chaw leh chawhmeh hminsa an khawn a, an khawn khawm sa chu hmun khatah an chhung khawm a, kan ei ta a. Kil dun reng pawh pakhatin ar bawp a lak laiin a kianga thu in dawltawm bawl a hmeh a, ankhapui bai hmeh te pawh an awm a. Chuti chung chuan chaw leh chawhmeh chu kan in chuh a ni mai a, nuihzatthlak hlimawm ang reng tak a ni," W.O.11 Ngurbiakvela'n a ti."
Chanchinmawia'n dawltawm bawl thak zet mai a la fuh a, enge a nih pawh hre lovin a hmawm thawih mai a, a rin aiin a lo thak a, thak ti chung chungin a lem lui ta thova, chaw an ei kham thlengin a la si, a mittui a parawl par maia, mi dangin an puar thu an sawi nak nak laiin a ni chuan kil khatah a mittui a lo hru fap fap mai a. Tukthuan an eikham vhuan an kal leh ta a.
Vapar khua leh Hnahlan inkar Tuithoh lui an thlen chuan anmahni lo hmuak tu Hnahlan MNF Unit President Pu Keiliana leh a thianpa Pu Zakawpa te nen an in hmu a, meizuk siam in an thu chawl a, Pu Keiliana te thiandun chuan Hnahlan Assam Rifle ho beih dan tur an lo duan tawhsa chu Pu Darhmingthanga an hrilh a, an in hrilh zawh hnu chuan an vaiin an ding a. Aw Pathian nang Lalber i ni tih hla an sa a, Pu H. Kapthianga Tlangpui khua Pathian hnenah a tawngtai a, a tawngtai zawh chuan Hnahlan khaw panin an kal leh ta a.
Assam Rifle Camp thlen hma mel hnih kawn ( Leisekawt an tih bawk) ah an chawl a, Pu Keiliana te thiandun chuan, " Tah hian lo chawl ula, khuaah kan phei anga, zanriah tur kan va ngaihtuah ang e," an ti a, an kal ta a. Khua an thlen chuan Major Darhmingthanga ho zanriah pek an ngaih thu an sawi a, nula leh tlangvalin chaw leh chawhmeh an khawn a, kawng hi Assam Rifle post hnuai maia kal a nih avangin kawngah kal ngam lovin kawng thlang lamah an hel a, an hel naah hian lengkir kalkai ngai te a awm a, hmeichhe tan phei chuan kal a awlai lo hle a ni.
Major Darhmingthanga ho chuan nghakhlel takin Hnahlan nula leh tlangval chaw pek chu an nghak a, rei an ti hle a, an ring an fan an fan mai a. Tlumtea thlir taka an thlir chaw leh chawhmeh phurtu nula leh tlangval chu an rawn thleng ta a, " Vapar khuaa kan ei aia standard deuh kan ei ang chu maw tia kan suangtuah laiin a standard pangngai tho, khawnkhawm dai duak lehnghal kan han dawng a, kan ril a tam em avangin kan ei nghal bawrh bawrh a, " A al lutuk, ka ei thei lo' ti an awm laiin ' a hang duak mai, chi a awm em' ti tawk an awm a, ' a thak lutuk, ka ei ngam lo, a thur tuau mai ei a harsa, a uih e mai ka ei thei lo' tihte chu kan chaw ei lai thawm ngaihthlak tur awm chhun a ni a. Kan kianga ding reng chaw min petute pawh an nui ringawt mai a ni," Capt Kapchhunga'n ati.
Zanriah an eikham chuan, " Tukin aiin ka puar zawk" ti an awm a, " Tukin aiin ka puar lo zawk" ti an awm bawk a. " Chaw leh chawhmeh tui lo deuh mahse a rawn keng tute an hmeltha a, ka puar tho" Capt Lalthanga'n a ti a. Chawngsiama (L) in, " Kan in ang a nih chu" a ti a. " Heti ang ration kan dawn reng chuan Independent ka sual rei peih ka ring lo" Zaithanga'n a lo ti ve thung.
Zanriah an eikham hnu chuan A.R post chhim tlangah an lawn chho a, tlang chhip leh a pangah tanhmun an rem a. Tanhmun an rem fel hnu chuan Major Darhmingthanga'n Bawlliana Khawhai khua chu platoon khat ho a Khuangphah kawnga vai sipai an tlanchhiat taka lo chang turin a tir a. Bawlliana ho chu an kal ta a.
"Silai local arms pathum chauh kan nei a, Khuangphah khaw panna kawtchhuah panin kan kal ta a. Kan thlen chuan kawng chhakah kan lawnatanhmun kan rem a, silai pathum chauh kan neih avangin Assam Rifle tlanchhia an rawn kal tak tak ang tih kan hlau hle a. Rawn kal tak tak se chuan a changtu zawk kan chechhe hle maithei a ni. Kan tanhmun a kan thut fel hnu chuan kan kiang lawkah chuan thawm ri sun sun kan hria a, ri chu a rawn hnai zel a, eng tak ni ang maw tia kan men phawk hle lai chuan an khuh ta khak mai a. Bawlliana chu a ding nghal a, thawm awmna lam chu silaia tin chungin 'Thamps,Pass Ward' a ti a. 'Chhura' tiin an chhang a, an tlan nghal a. Bawlliana'n, " Ding rawh u, in tlan zel chuan ka kap ang che u," a ti a. An tlan zel ngam ta lova. Chanchin kan in zawh chian chuan Hnahlan khaw volunteer Assam Rifle tlanchhuak chang tur an lo ni a, kan awm ho ta a ni," Ramtharnghaka'n a ti.
Bawlliana ho an kal liam hnu chuan Major Darhmingthanga'n, " Camp bul hnaia kal pawl insiam ila, inpe turin thlem hmasa ila, an duh loh chuan kan kap dawn nia, tha in ti em? a ti a. Capt. Lalthanga'n, " Tha ka ti a, ka thlawp e," a ti a. Major Darhmingthanga'n, " Pu Kapchhunga, Pu Sahulha te nen he lai hmunah hian lo awm ula, Assam Rifle camp bulah kan zuk kal ang e, inkap lova tih dan kan zuk zawng ang e," a ti a. Capt. Rualkhuma, Capt. Lalthanga, Inteligent Officer Chawngsiama te nen an pali in Assam Rifle camp panin an kal ta a. Assam Rifle camp hungna bula thingse kung lawnna remchang tak an hmu a, thingse kungah chuan Inteligent Officer Chawngsiama a lawn a, mi dang zawng chu a bulah an awm a. Camp chhunga mite hriat phak ngei turin ring takin a au va.
Chawngsiama: Jamadar sap, tunah hian Mizo sipai Batallion li in kan hual vek tawh che u a, inpe mai rawh u, in inpek loh chuan in camp hi kan ti vaivut vek ang.
Jamader: Engtinnge kan inpek ang?
Chawngsiama: In silai tung vek ula, in ban luchungah pharin camp atang khan rawn chhuak vek rawh u.
Jamader: Nangmahni kan camp tualah rawn chhuk ula, inhmaah kan inpe ang.
Chawngsiama: Ban phar chungin camp hungna pawnah rawn chhuak rawh u.
Jamader: In thu angin kan inpe ang.
DUHSAKNA AWKA CHU SILAIA CHHAN A NI
Jamader hian Mizo sipai rawn au tu awmna lai hriat a duh avangin a chhaih kual vel mai mai a lo ni a, a autu awmna a hriat hnu chuan 'In thu angin kan inpe ang e' tih a sawi zawh rualin a kap ta a, Chawngsiama chu an kap fuh teuh hle a, hmanhmawh tak thing kung kapzutin a chhuka, a dul a pilh deh phung lehnghal a. Assam Rifle silai ri chu tlanga tanhmun rem Mizo sipaite chuan an chhang let nghal a, silai chu a ri ta thuai thuai mai a. Assam Rifle 2" Mortar Gunner 1 Seikunga chuan 2" Mortar-in tlang lam chu a sai a, MNF te tanna lai a thlawh khum a, an tana hlauhawm phak lovah a tla a, silai a rik tan tirh hian khua a var thelh tawh a ni. MNF lam hian silai mu an ngah loh avangin an kap tam vak lova, Assam Rifle-te chuan silaimu an ren loh avangin an kap uar hle thunga.
Assam Rifle-te hian WT atanga Champhai, Lunglei leh hmun danga thil thlengte an hriat avangin pawn lama chhuah vah chi a ni lo tih an hria a, silai rik tan hma ni atangin Family lane a awm zawng zawngte chu camp chhungah an hruai lut veka, camp chhunga bunker leh bungker in kalpawhna laih sa vek a ni. Silai a puah hmain tuikhur a tui an chawi, tui chhun theihna zawng zawng ah an chhung khat veka, eitur lam pawh a theih ang angin an chhek khawl a.
Ni 5.3.66 zing khawvar hma deuhin silai a ri tan a, nileng leh zankhuain a ri a, a tu lam mah mah thi leh hliam an awm lova, khawchhunga awm MNF te chuan kawtchhuah leh feh kawngah te ralveng an dah a, Assam Rifle ho silaimu leng a hlauhawm lem loh avangin Pu Lianhlira in leh Primary School-ah an kal khawm a, fiamthu an thawha, an nui dur dur a.
Ni 5.3.66 zinga tukthuan min rawn petute hnenah Capt. Rualkhuma'n bawngtuthlawh leh suahdur a chah a, chaw min petute khuaa an kir leh hnuah tlangval tlawmngaiin leihlaihna hmanrua chu min rawn pe a, trench leh bungker kan lai nghal a, thlanlaih inchuh ang maiin trench laih chu kan inchuh a, thawm dimna chang pawh hre lovin kan ri lelu maia. Chutia kan rik lelu lai chuan camp atangin 2" mortarin min rawn sai a, kan awmna thlang lawkah a tla a, a puak ring hle a, a puah hnu chuan kan han bawk leh hnuhnawh a. 2" bomp a puah zawh be leh kan laih chhunzawm lehnghal a, ka thiante hi an huaisen hlawm hle a, keini ang chuan an hnung kan zui zolo mai dawn a lawm," Ngurbiakvela'n a ti.
Capt. Lalthanga'n, " Vai sipai ho khu an themthiam lo em mai, an vawi khat kahna chu kan thlang lawkah a tla a, a vawi hnihna chu a tla thlang leh deuh ang a, kan awmna tak hi rawn sai rawh u ti ti mah ila, an rawn kap fuh thiam lovang, a hlauhawm loh, tuman hlau reng reng suh u," a ti lur lur a. A sawi ang deuh chuan a hnu daiha an vawi thum kahna chu a tla thlang hle a ni.
Ni 5.3.66 zan a ni ta awm e, keini silai nei ve lem lo te chu silaimu leng hlauhawm lohna laiah kan awm khawm a, barrack atanga an rawn kah chhuah silaimu chu a puak chhawng thei a lo ni awm a, silaimu puak chhawng thei a awm tih kan hre silo a, hlauh tur a nih leh nih loh kan hre lova. Sipai bang thenkhat chuan thil an inti hre hle a, chuti ang silaimu puak chhawng thei chu a kual thei niin an sawi a, anmahni lah chuan an hlau hle lehnghal a. A hlauhawm zia an sawi lai chuan kan chung zawnah tak silaimu puak chhawng thei chu pahnih lai a puak chhawng a, kan tlan darh ta a. Kei chu tawite chau ka tlan a, kan thian a hlau zual te chu Vapar khaw thlenga tlante pawh an awm a ni," H. Kapthianga'n a ti.
Assam Rifle te hian a khat tawkin 2" mortarin an bomp zauh zauh a, ni 6.3.66 ni a an han bomp lrh chu Rothuama Tlangpui khaw bul lawkah a tla a, Rothuama kawr zakhnuaiah a deng thler a, a zakhnuai tlem a hliam a, a dulah a sir zawng, vangtan zawngin bomp in a deng thawi tel bawk a, a thi duh hle a, a thianten an bawihsawm a, hmun him silaimu leng hlauhawm lohna lamah an kalpui ta a.
Zalenna sual avanga silaimu ri ta chiam mai chu an la tawn ngai loh a nih avangin Hnahlan khaw mipuite chu an bangbo hle a, awmdan tur pawh thiam har anti a. Volunteer thenkhatten, " Lungngai ma ta che u, Hnahlan sipai camp hi kan han la ang a, hmun danga sipai post te pawh kan thianten an la nual tawh a, kan lak zawh vek hunah chuan kan independent mai dawn a lawm," an ti a. Pu Lianhlira in leh Primary School a volunteer inhawrkhawm thin kha, ni 6.3.66 ni chuan Pu Lianhlira in a awm tawh lovin Primary School-ah an awmkhawm ta a. A chhungah leng hek lo, a chhunga leng bak chu a compound ah an awmkhawm a, an thu nghuk mai a.
Eitur hi a hranpaa ngaihtuah lovin chhungtinin volunteer eitur chaw leh chawhmeh an rawngbawl laiin an chhum kep a, chawhmeh leh chaw hminsa chu Hnahlan khaw nula leh tlangvalin an khawn a, chaw chu dawrawnah an dah a, chawhmeh chu tin leh belah an chhunfin zel a, an khawn khawm chu volunteer te an pe ta thin a ni. Sipai camp chhimlama tangte chaw pek chu kawng pangngaia kal ngam a nih loh avangin a buaithlak hle a, nitin tum hnih volunteer zahnih rual chaw leh chawhmeh pek a ngai ziah si a, nula leh tlangval an hah hle a ni.
Ni 6.3.66 zingah Major Darhmingthanga chu section khat hruaiin Hnahlan khuaah a phei a, Hnahlan lam MNF hruaitute nen an inkawm a. An inkawm lai hian sipai camp atanga lo kal Sepoy Seikunga a tel bawk a. Seikunga chu inpe mai tura a thiante hneh dan ngaihtuah turin an hrilh a, " Seikunga hian an ui vulh a rawn hruai a, a thau tha met mawt hle a. Camp Commander address-in inpe thuai tura ngenna leh an inpek vat loh chuan tihchimih vek an nih tur thu vauna vai tawng Roman script in Pu Darhmingthanga'n a ziak a, lehkhaah chuan a hming leh rank a ziak a, lehkha chu a thlep a, Seikunga ui rawn hruai chu a seh tir a. Seikunga chu a kir leh ta a, ui chuan Major Darhmingthanga lehkha seh tir chu a pu zela, camp Commander hmaah a thlauh a ni tih a hnuah kan hre leh a, thilmak ve ang reng tak chu a ni," Pachhunga'n a ti.
Sepoy Seikunga leh a ui camp-a an kir hnu chuan Major Darhmingthanga te chu an kir ve leh nghala, an tanna atangin vai sipai chu an kah chhunzawm a. " Vai sipai an inpek duh mai loh avangin kah zel an ngai a, silaimu kan ngah vak loh avangin Lt Thanzuala Sialhawk leh tlangval pahnih silaimu la turin Ngurah ka tir a. Lt Thanzuala ten Ngur khuaah kan hotute an hmu a, silaimu la tura tirh an nih thu an hrilh a, mahse, la lovin Hnahlanah an rawn kir a, ' silaimu pek in ngai lovang, kan unau Naga rammu Batallion 4 in min rawn pui dawn a, silaimu keng lovin kir leh mai rawh u, min ti a, kan rawn kir leh nghal mai a ni, tiin min hrilh a, " Lehkha pawh an rawn thawn in ka hria, engtin tak nge a in ziah ka hrechiang ta lo a ni." Major Darhmingthanga'n a ti.
Hnahlan khaw mipuiten khua atanga inthiar chhuah an tum a, " Hlau suh u, inthiar chhuah a ngai lo, vai sipaite hi an tlawm tep tawh a lawm, ka ti a, chu chu kan nau kawtchhuaha ralvengten ' Kan hotuten inthiar chhuah an phallo', tiin inthiar chhuah tumte an lo dang kir a ni awm e. Hnahlan khaw mipuiin ka hnenah 'Engati nge inthiar chhuah in phal loh, daia inthiar chhuah kan duh a ni' an rawn ti a. Thil fel lo awm thei dawna ka hriat avangin Hnahlan khua MNF hotute nen kan sawi khawm a, eirawngbawl a ngaih avang leh sipai awmna piah muala mite chaw pek reng an ngaih avangin ' Nula leh tlangval hi chu khuaah awm se, a bak zawng chu an duh duhin an awm thei a lawm' kan ti a. Kawtchhuah leh kalkhana ralvengten tumah an dang ta lo a ni", Major Darhmingthanga'n a ti.
Ni 6.3." 66 ni chuan thlawhtheihna (dacota) in Assam Rifle ho eitur, tui leh ration a rawn thlak a, Assam Rifle ho chuan lak mai an tum a, MNF ten an kah avangin an la ngam lova. Hemi ni chawhma lam hian Pharmacist KC Lalmuana'n an hotu Jemader hnenah a nupui leh fate Hnahlan khuaa dah mai a duh thu a sawi a. Jemader chuan, "Thil thlir dan thiam a har khawp mai, tha i tih angin ti mai rawh" a ti a. Pu KC Lalmuana'n a nupui Pi Kaithiangi leh a fate pahnih chu Hnahlan khuaa an chhungte inah a dah a, a dah zawh hnu hian camp-ah a kir leh thuai a. Pu Seikunga pawh hian a nupui leh fate Hnahlan khuaah hian a dah ve bawk a ni.
Zan khawthim hnuaiah pawh silai chu a ri reng a, silai ri mahse tumah an inhmuh theih chuan loh avangin sipai ho chuan thlawhtheihna in ration a thlak chhuna an lak ngam loh lak nan an hmang hlauh a. Ni 6.3."66 tlai atangin ruah a sur ta vak mai a, thimtham ruahsur bawk si hnuaiah chuan chaw inpekna chi a ni lova, chaw eiturin khua an pan a, vawikhatah a ruala kal vek lovin an in kal chhawk a, thenkhat khuaa an kal laiin thenkhatin an lo kap a, chuti ang chuan an in ban let a.
Thimtham ruahsur hnuai a ni bawk si a, tqhiante pawh bulhnaia mi lo chu awmna chin an in hrelo hle a, 'M' Bn kal zinga naupang ber Chanchinmawia'n a u Ramtharnghaka nena a nena an inzawn tur puanthuah a ak a, a u chu a zawnga, a hmu mai si lova; chutih lai chuan a u Ramtharnghaka'n a nau chu a zawng ve mek bawk a, a hmu thei lova. Han inzawn vak ngaihna a awm si lova, inngaihtuah tawn tak, inhmu si lovin an tlaivara. Chanchinmawia'n a u tel lova a puanthuah ken sin bik chu a duh si lova, puan sin lovin chu mi zan ruahsur khawvawt tak chu khur bauh bauh chungin a tuar tlaivar a ni.
Ni 7.3.1966 ni chaw fak lai velah thlawhtheihna Bombard an tih chu khaw chungah a rawn thlawk a, khaw chung sang takah chuan a changin a dir (ding) a, a changin a thlawk kual bawk a, a duh tawk a ngah ta a niang chu a thlawk liam ta a. Thlawhtheihna khaw chung zawna a dir lai leh a thlawh kual lai te chuan MNF volunteer thenkhat chuan, " Kan lam ta a nih khi," an ti a, an hlimpui hle a.
Volunteer Nengzaliana chuan ulhbun phir a pu a, a hawi cham hle a, a thianpa Chuhvela'n a mu a keng thunga. Thlawhtheihna khaw chungs a thlawh laiin Capt Chhingzuala'n, " Nengzalian, i silai khan thlawhtheihna khi han kap teh," a ti a. A silai ken chu an ulh bunga, a mu a'n thun dawn a, a mu chu a thianpa Chuhvela'n hmun danga a len pui daih avangin a mu thun tur a nei ta lova. Nengzaliana hrilhhai chu a hawi a hawi mai a. " Nenga te tak hi chu aw, khua a var lo mang e," Chhingzuala'n a ti a, Nengzaliana chu za vak lovin a nui rah rah a.
Chawhnu her a ni tawh a, W. T Operator Lalsanga'n indo thlawhtheihna ( Fighter) a rawn puih an tum thu leh khua hal an tum thu message a dawng a, a thu dawn chu Jemader hnenah a hrilh nghal a, Jemader bakah a thiante pawh a hrilh a. Pharmacist K. C Lalmuana'n Jemader hnenah, " Kan nupui leh fate khuaah an awm si a, khuaa kala Fighter-in beih a tum thu va hrilh a ngai a ni," a ti a. Jemader hian an nupui fanaute an ngaihtuah a ni tih hriatpuiin khuaa kal chu a phalsak a. Nau rual zanriah chhum hun velah K. C. Lalmuana leh Seikunga chu khuaah an phei a. MNF hotute nen inhmu in Primary School-ah an titi a, MNF ho zingah zanriah an ei nghal a. MNF hruaitute chuan , " In nupui fanaute helamah an awmsa thova, nangni pawh kir tawh lovin kan hnenah awm ve nghal ula, India sawrkar hi kan do tlang mai dawn nia, " an ti a.
" Headquarters atanga thu kan dawn dan chuan Hnahlan khua hi Fighter-in an rawn bei dawn a, a tam thei ang ber insaseng nghal rawh u, chuti lo chu in tuar lutuk ang tih a hlauhawm a ni, " an ti a. An inkawm zawh chuan Camp lamah an kir nghal a. Hmanhmawh takin kan kal vat vat a, camp kan thleng fel hman chiah a, Fighter-in min rawn pui ta a ni, " Pu K. C. Lalmuana'n a ti.
Pu K. C. Lalmuana te Hnahlan khuaa an kal hma deuh hian volunteer-te chu field hmaah an intlar a, an hotuten camp luhchhuah tur mi 100 an in thlang chhuak a, " Thlanchhuah zingah hian ka tel ve a, kan hotute thu a rum hle a, Assam Rifle- te hi eng ang pawh in tang se kan luhchhuak ngei ngei tur a ni, " an ti a, kan luhchhuah hun a tan chuan zan dar 10:00-12:00 inkar nise an ti a. Thlanchhuah ho Commander atan Pu Sahulha an ruat a, thlanchhuah ho chu dai lamah kan kal ta a, dai kan thlen hnu deuhah Jet Fighter a rawn kal ta a ni, " Ramtharnghaka'n a ti.
HNAHLAN KHUA A KHUR
Indo thlawhtheihna in khua a bomb dawn tih an hriat chuan mipui khuaa la awm te chuan hmanhmawh takin dai lam an pan a. Damlo Pu Thangfala pa chu a chhungten an pua a, midang pawh puak ngai an awm nual a, hmanhmawh vanga inpaltlu tawk an awm bawk a. Tlailam dar 4:00 vel a ni awm e, indo thlawhtheihna pahnih a rawn lang ta a, khaw chunga vawi khat thlawh kualnaah chuan a kap nghal lova, a vawi hnih thlawh kual naah vai sipai camp hualtu tlang chhim lam tlang leh khaw chhung chu puakrang silaiin a hawl ta chiam mai a, puakrang silaia kah chu duhtawk lovin bomb leh meikhu bomb a thlak bawk a, a ri tawk tawk a, a ri thuai thuai a, a ri hum hum a, a ri dum dum bawk a, ngaithlaa a ri hre velo tan chuan a rik dan leh a rapthlak dan sawifiah har tak a ni.
Assam Rifle Camp chhim lam MNF tanna tlang chu puakrang silaiin a han tlir ta tak tak mai a, a rik hian a ri tuarh tuarh mai a, puakrang silaimu tawng fuh thing hnahte chu an til chum chum a, bomb tla in thingzar a per chhumte chu an tla lawng lawng a, a per chhum zawh lohte chu chhum lovin an uai hnep hnup bawk a. Hnahlan khaw chhung pawh heti ang tho hian a bei a, Hnahlan khua chu a khurh hian a khur hlawk hlawk a ni ber mai.
Major Darhmingthanga ho tanna trench leh bunker bul lawk lawkah chuan bomb a tla puak dur dur a, Hrangdawla trench a awm chu fighter atanga kartut ruak tlain a hnarah a deng thawi a, " Ka thi ta!" tiin a au va, a thiante chu a awmnaah an tlan phei vat a, a hnar chu pilh pawh a lo pilh si lova, amah chu a hrilhhai letling hle a, "Thiantha ka neih leh neih loh ka'n fiah a nih kha, " a ti ta ringawt a.
Indo thlawhtheihna rum hum hum, puakrang silai ri uarh uarh leh bomb puak dur dur ri chu a rapthlak em avangin dai pana tlan naupang leh hmeichhiate chu an rak chelchul a, thenkhat an tap a. Thenkhat chu tlan zel ngam lovin hnimbuk hnuaiah an bawk a, hnim buk hnuaia bawk ve Pu Ralngena'n, "Pathian kutah i inkawl tir phawt ang u," a ti a, a tawngtai a. A tawngtaina hmunah chuan midang an rawn tlan thleng a, " Tawngtai a sawt lo, eng anga nasa pawhin tawngtai mah ila Pathianin min veng chuang lovang, tawngtai ai chuan tlan a tha zawk, " an ti a, an tlan lehnghal a, tawngtai ngaithla mek thenkhatte pawhin a tawngtai zawh hmain an tlansan a.
"Indo thlawhtheihna a rawn thlawh kual hmasak ber laiin ka nute nen inah kan awm a, kan kawmchhaka awm ka puin min rawn ko a, ka han thlen chuan, ' Mami, ka tir duh zawk che a nia, ' a ti a. A sawi zo hman chiah tihin indo thlawhtheihna a rawn thlawk kual leh a, puakrang silaiin min rawn kap ta chiam mai a, bomb a thlak bawk a. Ka hlau lutuk chu ka bing deuh chuk chuk a, tlanchhiatna tur pawh ka hre lova, ka mangang chuan ka pute kawmchhak thingbuk hnuai chu ka pan a, a hnuaiah ka biru a. Thlawhtheihna a thlawh liam hnu chuan kan inah ka tlan thla a, inah chuan ka nu leh ka naute an lo awm tawh lova, dai lamah an tlan thlak ringin dai lam ka pan a, ka tlanna kawngah chuan bomb den khuar ka hmu thla thluah a.
Thlang deuhah ka nute chu ka umpha ta a, ka nu chuan ka nau Lalruatthangi a lo pua a, a hnungzang leh banah chuan thi a lo luang nguai mai a, midangte pawh an lo thleng ve a, ka nu chu an puak chhawk a, thlang deuh kan thlen chuan kan chawl a, ka nau chuan, " Ka tui a hal em mai, tui min pe rawh u," a ti a. A nak hliam atang chuan thisen a rawn put chhuak zawih zawih a, a hmel chu a dang deuh bem in ka hria a, ka nau na tuar chu ka han en thin a, ka khawngaih em em a, ka nu chuan ka nau biang chu a chul a, a chul zawng chuan ka nu ban bomb themin a perna hmuamhma atangin thisen a rawn chhuak tiam tiam a.
Ka nau kum 7 mi lek, a naka bomb-in a per chu harsa ti takin a thaw hram hram a, 'A u, India sawrkar hi an sual ti raw, an pawi engmah kan sawi miah si lova, thlawhtheihnain min bomb a, a u, sual i ti ve em? A u, ka nak a na lutuk... ( A mittui a tla zawih zawih a) a u, min kalsan tawh suh aw, " tiin ka kut a vuan a. Chutuih lai chuan tuisik an rawn la a, no khat chu a in zo nghal a, " Ka lawm e," zawite in a ti a, a maimitchhing diar diar a, bisk zui tur awm lovin a maimitchhing hlen ta a ni! Ka nau ka hmangaih em em, hming pum pawh a ka koh phal loh, ka nau Maruati, ka thlakhlelh em em chuan mual min liamsan ta. " Van Angel te u, ka nau Maruati hi lo lawm in lo duat ang che u aw.. ' ka ti a. Mittui luang zawih zawih chungin ka nau chu ka pawm a.
Indo thlawhtheihna a rawn rik hum hum khan in atangin i nau Lalruatthangi nen kan kawmthlang kawngah dai lam panin kan tlan dun a, kan piah lawkah bomb a rawn tla a, Ruati chu a let tawp a, a kiangah ka thingthi rawp a, ka pawm lawk a, ka tlanpui ta a, thlang deuh kan thlen chuan ka han en chiang a, a nak dinglam hnuaiah bomb-in a per a lo ni a, a hmuamhmaah chuan thi a rawn put zung zung a, ka pua a, Tiau lui lam panin kan kal ta zel a, thlang deuhah miin min rawn umpha ta a ni. Ruati bawihsawm a kan chawlh lai khan kei pawh ka banah bomb-in min per tih ka hre chhuak chauh a ni, " tiin ka nuin min hrilh," Sapkhumi'n a ti. Sapkhumi pa hi Chhawnlinga a ni a, a nu hi Lianthuami a ni.
Thangvela kum 41, a rilru kim loh avanga kutkawl an bun tir chu in kangah a kanghlum a, Tv. Thangkima s/o Ngulkhama bomb per vangin a hliam a, a hnuah a hliam chu a thihpui a, Tv. Hrangzova leh Tv. Hauchhawna te bomb per vangin an hliam bawk.
Indo thlawhtheihnain khua a bomb lai hian Pu Lianhranga'n, " In kang tur ka veng dawn" a ti a, thlangra a keng a, sumhmunah a ding a, a vanneih vang nge ni sn in leh an thenawmte in zuk kang ve miah lo a.
"Kan huan chhungah trench kan nei a, thlawhtheihnain a rawn kah lai chuan trench-ah kan biru a, thlawhtheihna thlawh liam hnuah kan chhuak leh mai thin a, thlawhtheihna chuan kan in chu kah alh tumin a bei chiam a, a kap alh thei lova, a thinur a niang chu ka ti mai a, puakrang silaiin a tlir ta chiam mai a. Puakrang silaia a rawn tlir lai chuan bunker-ah ka zuang lut a, kan in leh a chhehvel chu puakrang silaiin a hawl nasa hle a, bomb a thlak nasa hle bawk a, bomb chuan kan in a tikang ve ta a, thelh ka tum a, ka thelh thei lova, fighter a la rawn vir fo avangin daiah ka insaseng ve ta a ni," Pu Khuanghluna hemi lehkhabu ka ziak laia kum 85 miin a ti.
In 100 chuang a ruala a han alh hluah hluah mai chu a rapthlak hle a, mei alh ri chu a ri hum hum mai a, fighter-in puakrang silaia a hawl nasat avangin tam tak chu daiah an tlanchhia a,sn in kang pawh an hmu lova, daia tlan ve lo thenkhatte pawh a huaisen zual tih loh chuan anmahni in kang pawh an thelh ngam chuang lo.
MNF-in Hnahlan sipai post an bei dawn tih an hriat atangin Hnahlan khuaa chengte chuan an in bulah trench leh bunker an siam a, fighter-in a rawn beih lai hian mi thenkhat chu daiah tlanchhe ve lovin bunker-ah an tlan lut a, fighter thlawh liam hnuah an rawn vhhuak leh mai thin a ni. Pu Laltinkhuma Sailo leh a chhungte pawh Fighter-in a beih lai chuan bunker-ah an tawm a, kum 2010 a he lehkhabu ka ziak laia Hall awmnaah hian an in a awm thin a, Presbyterian biakin chu a hmun ngaiah a la awm.
Biakin hi a lan mawi theihna turin a chung chhawng lian vak loin an sak belh a, a bang thingphel a ni a, a chung rangva a ni. Indo thlawhtheihnain tum hnih a kah chiam hnuin Pu Laltinkhuma nupui chu bunker atangin a chhuak a, an kawt atangin a hawi kual a, Biakin chhawng kang lai chu a hmu a, " A khu, Biakin a kang" a ti a. Laltinkhuma Sailo chuan a han thlir ve a, " A nih tak khu, kan thelh ang e," a ti a, an kawta thingfak chu a la a, Biakin lamah chuan a tlan thla a. Biakin chunga lawnna mau leihlawn chu a dawh a, Biakin chungah a lawn a, Biakin chhawng bang thingphel kang lai chu a kilhna vaw dawkin a vaw thla a, phek 3/4 a vuak thlak hnu chuan Biakin kang chu a thelh mit thei ta a. A ni hi chu awm lo se Biakin hi a kang vek dawn tihna a ni a, a huaisen leh tlawmngaih avangin Biakin hi a him a ni.
India sawrkarin thapui thawha Jet Fighter nena a beih tak avangin Mizo sipaite chu an insaseng ta a. An tanna hmun a inan loh avangin an insasengna lam pawh a inang lova. Thenkhatin Vapar lam an pan a, thenkhatin Tiau lui lam an pan a. Assam Rifle post chhim lam tlanga tanhmun rem Vapar lama insaseng hnudaltuten metre 100 vel an kal hnuah an hnu lam an hawi kir a,an tanna hmunah khan ruang niawm tak an hmu a, Major Darhmingthanga'n , " Saw laia mi saw ruang a va ang ve, va enchian a ngai a nih saw, tunge va kal ang? In volunteer thei kan awm em?" a ti a. Ngurbiakvela, Pachhunga (L) Sialhawk, Renga Biate khua leh Parama (L) ( Ramhluna) Biate khua te chu an in volunteer a.
" Kan hnu lamah chuan kan pali-in kan phei a, Assam Rifle-te chuan min rawn kap nasa hle a, kawng bulah chuan khiang thing lian zet mai hi a awm a, chu chu kan phen ta ringawt mai a. Khiang pilte chu an rawn kao thla hlawk hlawk mai a. Kan enchian tur miruang ni awm tak kha miruang a nih leh nih loh kan la hre thei si lova, Parama'n, " Ka va enfiah ang e" a ti a, silaimu leng karah chuan a kal ta a. Mi ruang ni lovin puanchhiain hnim a khuh a lo ni a, a chian hnu chuan a rawn kir lehnghal a, kan thiante chu kan um leh ta a. Parama hi a huaisenin tlukloh rim a nam ngei mai," Ngurbiakvela'n a ti.
Tiau lui lama insasengte chu an hmanhmawh hle a, chak zet zetin an tlan a, an ri buan buan mai a, Chawngsiama'n, "Kha ti buan buan kha chuan tlan teh suh u, in ke te kha in pal tliak palh ang e, damdawi kan nei tha lo a nia," a ti a, mahse, an tlan ngai rengin an tlan a, inti na lem loin Tiau lui an thleng ta a. Tiau lui kamah an chawl a, an kim leh kim loh an han in en kual vel a. Sahulha pawl a mi Biakthanga a kim lo tih an hria a, Burma ram chhung Bapui khuaah a awm leh awm loh an han en a, a lo awm a, a ni hi chu a thiante an insaseng hma deuh a inhmakhawsuih deuha insaseng a lo ni.
"MNF-te insaseng hnua khawchhung kan han fang chu Fighter-in bomb a thlakna lai chu vawk bual ang mai hian a khuar thliah thluah mai a, Primary School, dawrkawn, lalmual leh Pu Khuanghluna in bul velah bomb a tla hnem ber a. India sawrkar hian heti tak mai hian a ni maw min beih duh, an va huattlala awmin an va rawng em em ve tih loh rual a ni lo. Thlawhtheihnain bomb a thlakna hnuhma hi midangte pawhin an hmu ve a, an thinrim an chek tlawk tlawk mai a ni," tiin Pi Zaruali kum 80 miin min hrilh.
" Fighter-in a bomb fuh in awp nghal rawkte pawh a awm a, in a kan rem hnua bomb tlakna lai kan han en chuan ft, 5 bial vel tur hian a khuar a, a thuk zawng pawh ft,2 lai a ni. Khaw chhung leh dai vela bomb tlate hi a khuar zau zawng leh a khuar thuk zawng a inang vek lova, lei nem leh chang deuh lai leh lung hmuna tlate chu in an vek ngaihna a awmlo reng a. Pathianin min veng a, thi leh hliam kan tam lova, kan vannei a ni," tiin Pu Immanuela'n a sawi.
" Indo thlawhtheihnain puakrang silaiin mipui pawisawilo min kap chiam a, min bomb bakah kan in min bomb kan sak bawk a. Khawlaiahte chuan bomb leh silaimu tuar vawk, ar leh beram an thi thal pheng phung mai a. Min beih nasat ngaihtuah chuan thi leh hliam kan tlem hle a, thi leh hliam kan tlemna chhan chu Pathianin min tanpui vang ka ti lo thei lo a ni," tiin Pu Lalremliana'n a sawi.
Fighter-in in a bomb alh zawng zawng hi in 157 a ni a, MNF ten an tinsan hnuah in 4 Pu Thangfala, Pu Ralnuairuma, Pu Thanhnuna leh Pu Ngurnghaka te in an hal a, in kang zawng zawng chu in 161 a ni.
Fighter-in a bomb, puakrang silaia a kah leh in a hal avanga mipui hlau tlanchhia chu chhungkhat pawh an tlan hrang nuaih a, an inhmukhawm lehnghal mai thei lova, thenkhat khaw thenawmah an tlan a, thenkhat ramhnuaiah an tlanchhe bawk a, an inhmukhawm kim leh meuh vhu chawlhkar thum hnuah a ni.
Hnahlan khua engti takin nge thlawhtheihnain a beih a, a bomb hriat tumin kum 2010 June thlaa Hnahlan khuaa ka kal in, thlawhtheihnain a thlak bomb pakhat inches 5 a sei, silaimu ang deuh kg.1.25gram a rit, an dahthat min pe a, hei hi a thlalak a ni.
Fighter-in a beihnaah hian ar leh vawk leh beram engemaw zat a thi a. In kang zinga 100 vel chu thingzai In niin a chhuat pawh thingphel a ni a, in kang zingah hian rangva in 5 a kang tel, Presbyterian Biakin a kang lova, Middle School a kang lo bawk. In kangah hian in tinah buh tin 100 awm angin a chawhrual theih awm e. Puanthui khawl ke khawl 4 leh kut khawl 2 a kang chhe bawk. Heng bakah hian mai, maipawl, chhawhchhi, bete leh hmarcha engemawzat a kang bawk. Thil kang ral hlut zawng:
1. In 161 161×300 = Rs 48,300/-
2. Vawk, bawng, ar adt. = Rs 4000/-
3. Ke khawl 4 300×4. = Rs 1,200/-
4. Kut khawl 2 150×2. = Rs 300/-
5. Buh tin 100 in khatah 100×161×3 = Rs 48,300/-
6. Mai, maipawl adt. = Rs 5,000/-
Belhkhawm. = Rs 1,07,100/-
( Cheng nuai khat, sangsarih leh za)
MI BIAKRAWNTE:
1. Pu Darhmingthanga Khawzawl ni 8.6.2010
2. Ngurbiakvela Zarkawt ni 17.7.2010
3. Pu Chanchinmawia Chawnpui ni 9.12.2010
4. Pu H. Kapthianga Chawnpui ni 3.2.2011
5. Pu Lalthanga Ramhlun Sept, 2009
6. Pu K.C Lalmuana Dinthar ni 12.6.2010
7. Pu Ramtharnghaka Chawnpui ni 3.2.2011
8. Pu Thangfala Hnahlan ni 6.6.2010
9. Pi Sapkhumi Hnahlan ni 7.6.2010
10. Pu Khuanghluna Hnahlan ni 6.6.2010
11. Pu Laltinkhuma Sailo Thakthingtlang ni 14.6.2010
12. Pi Zaruali Hnahlan ni 6.6.2010
13. Pu Immanuela Hnahlan ni 5 leh 6.6.2010
14. Pu Lalremliana Hnahlan ni 6.6.2010
Source: THLAWHTHEIHNAIN MIZORAM A BOMB by C. ZAMA
