Vawiin Dt. 06.07.2023 (Ningani); 10:30 a.m khan Mizoram hmun hrang hranga an hman rualin Community Hall, Hnahlanah Joint MHIP, Hnahlan huaihawtin MHIP Day vawi 49-na chu Hnahlan MHIP North Branch leh Hnahlan MHIP South Branch, Darnam Branch leh Saron Branch-te chuan an hmangho. Chawhma lam hun hi Pi Zokhumi; President, Joint MHIP, Hnahlan chuan a kaihruai a. Pu James Lalrinchhana; Deputy Commissioner, Champhai District chuan khuallian niin a hmanpui a ni. Hnahlan VC, NGO hrang hrangte aiawh leh MHIP member ṭhahnem takte nen an vaiin mi 250 vel zetin hun an hmang a ni.
Tanna hun chu Pastor Lalnunthara, Mizoram UPC chuan hmangin a zawhah hian nikum 6th July leh kumin 6th July inkara Member boral 14-te sunna hun hman a ni. Branch tin report ngaihthlak a ni a, Secretary; Joint MHIP, Hnahlan chuan Headquarters atanga MHIP Day thuchah a chhiar chhuak bawk. He huna kalten MHIP Thuthlung sawi rualna an nei.
He hunah hian Pu Lalremruata Cherput, Hnahlan VCP chuan thu sawiin, tun hma chuan Hnahlanah ei leh bar zawn a harsat thu leh sum leng vak a tam loh ṭhin thu te, Grape chîn a nih hnuah Hnahlan Economy-in nasa taka hma a sawn thu te leh thu pawimawh hrang hrang te a sawi a. Kumin October thlaah Hnahlan kum 100+25 Jubilee lawm a nih dawn thu te sawiin hemi atana Hnahlan khawtlang tana pawimawh thil hmachhawpte leh khawtlang tana thil pawimawh hrang hrangte Khuallian hnenah a thlen bawk.
Khuallian Pu James Lalrinchhana; Deputy Commissioner, Champhai District chuan thu sawiin MHIP chu din a nihna hmun hrang hrangah an ṭangkai ṭhin thu leh thlamuanpui tham an nih ṭhin thute a sawi a. Nuhote chu chhungkaw tana mi hlu leh ṭangkai tak an nih thute sawiin Zirna chungchangah leh Faina kawngah theihtawp chhuaha mahni tu leh fate hmakhua ngaihpui zel turin a chah a ni.
Khuallian chuan ruihhlo chungchang pawh sawi telin Drugs ti lo tur leh chumi laka fihlim thei tura theihtawp chhuaha mahni tu leh fate enkawl a ṭul thute a sawi. Ruihhlo ngaitute leh leh damdawi ti ṭhin an hmu a nih pawhin hmusit leh entleu mai lova hmangaihna nena siam ṭhat a ṭul zawk thute a sawi bawk. Khuallian hian Joint MHIP, Hnahlan tan thingpui inna No a pek bakah Hnahlan khawchhunga MHIP Branch hrang hrang pali te hnenah Silpauline pakhat ṭheuh a pe bawk.
Thingpui in chawlh neih a nih hnu 01:15 pm velah chawhnu hun ṭan leh a ni a. He hun hi Pi Lalsangpuii; Vice President, Joint MHIP, Hnahlan chuan kaihruaiin Pi Lalbiaklawmi; President, Hnahlan Block MHIP pawhin kumpuan thupui sawi hawngin ani bakah hian khuallian rawn ṭawiawmtute leh sawm bik NGO dangte hnen aṭangin hmeichhiate dinhmun pawimawhna leh mawhphurhna hrang hrang thu ṭha tak tak ngaihthlak a ni bawk.
NGO aṭanga minute 3 chhung thu sawi theihna hunah Pu Lianhmingthanga Hnamte; Vice President, Jt. YMA, Hnahlan chuan thu sawiin tunlai hian tlaivar, thlan laih leh YMA chêt chânna kawng hrang hrangah YMA member-te kan tla hniam ṭan tawh hle a ni a ti a. Nuho kalkhawmte chu lusunte hnem tura an tu leh fate tir chhuak ṭhin turin leh an pasalte zingah pawh kum 50 ral la kai lote pawh an theihtawpa lusunte hnem tur leh YMA chetchannaa tel ve ṭhin tura fuih ṭhin turin a chah bawk a ni.
MHIP Branch palite chuan khawhar hla 'Tah lai ni kawl kung zamual a liam thei lo' tih hmangin zaia intihsiakna an nei a. North Branch MHIP chu pakhatna niin, pahnihna Saron Branch MHIP an ni a; Darnam Branch MHIP chu pathumna an niin, South Branch MHIP an ni. Tin, he hunah hian MHIP Day hmangtu zinga kum 70 tling chinte hnenah lawmpuina thilpek hlanna neih a ni. Day hman ni hian Rualbanlote pualin bawm dawh niin Rs. 4,310 zet hmuh a ni bawk.
MHIP Day lawmnaah hian Branch palite aṭangin Nl. Ngawihsawnhuaii, Pi Ngaihliani, Nl. Ngaihhmingliani leh Pi Ruthi Vanlalnghinglovi te zai ngaihthlak a nih bakah Joint MHIP, Hnahlan aiawhin Par lam entir a ni. South Branch aṭangin Khual/Lal hmuahna hla leh North Branch atangin Chheih lam entir a ni bawk. Programme hman zawh hnu hian Bawng leh Vawk sa nen puar leh tlai takin ruai kilho nghal a ni bawk.
Hnahlanah MHIP Branch pahnih- North Branch leh South Branch awm thin chu Branch din belh niin kum 2019 khan Saron Branch MHIP din a ni a, kumin February 27, 2023 khan Darnam Branch din thar leh niin, tun dinhmunah Hnahlanah hian MHIP Branch pali (4) a awm mek a, heng zingah hian Hnahlan North Branch MHIP-ah member 398 awmin, South Branch MHIP-ah 320 an awm a, Darnam Branch MHIP-ah 115 awmin, Saron Branch MHIP-ah member 54-te nen Joint MHIP, Hnahlanah hian member 887 vel zet an awm mek a ni.
Vawiin niah hian Mizoram pumah MHIP member 2,80,000 vel an awm mek a; Sub-Headquarters 10, Block 26, Joint 19 leh Branch 758 an awm mek a ni.