19th Agust, 2023: Hnahlan Grape Farming & Processing Coop Society (HGFPCS) Ltd leh A North East Wave (NEW) Initiative-te tawngkawp chuan vawiin khan Hnahlan Winery-ah Grape Festival 'The Grape Escape' an buatsaih. Champhai North bialtu MLA Dr ZR Thiamsanga chuan khuallian niin a hawng a. Pu Anil Oraw, Regional Director, Ministry of Tourism, Govt of India chu khualzahawm a ni. The Grape Escape hi SEDP sum kaltlanga ruahman a ni.
Dr ZR Thiamsanga chuan Hnahlan Winery-ah Grape Festival 'The Grape Escape' buatsaih a ni chu grape chingtu kuthnathawktute leh tourism hmasawnna atana hmalakna ropui tak a ni tiin, kuthnathawktute eizawnna kawngah ah pawh hun lo kal zel turah nghawng tha tak a neih ngei a beisei thu a sawi a. Horticulture, Argiculture, Rural Development leh Department dangte pawn grape chingtute anlo duhsak thin naah lawmthu sawiin, an hmalakna hrang hrangah lo pui zel thin turin a ngen sak bawk a. Grape chin chu eizawnna a tlin thu sawiin grape chingtu kuthnathawktute pawh thahnemngai taka hma lo la chhunzawm tura chahin an mamawhte ngaihven sak zel a tum thu a sawi.
Kan State thenawm Manipur leh Myanmar te an buai karah hian kan unau Zohnahthlak te tan theihtawp kan chhuah tlan a, kan inpumkhatna turin mitinten kan tanrual a tul takzet a ni tiin, kan ram leh hnam damna turin mahni zawn theuh a mitinten tih theih kan nei a ni tiin kalkhawmte theihtawp chhuah theuh turin a ngen a ni.
Pu Anil Oraw, Regional Director, Ministry of Tourism, Govt of India chuan The Grape Escape chu Mizorama wine industry leh tourism lama hmasawnna pawimawh tak anih thu sawiin a program buatsaihtu te fakawm a tih thu a sawi a. Sawrkar Laipui Ministry of Tourism hnuaia India rama Tourism hmasawnna tura project lian tham Swadesh Darshan 2.0 hnuaiah Champhai District-ah Wine Tourism kalpui anih tur thu sawiin hemi atan hian sum pawh sanction fel anih tawh thu a puang a. Heng hmalaknate hi a hlawhtlin ngei theihnan kuthnathawktute leh sawrkar official te theihtawp chhuah tura ngenin hmalak puiah a sawm.
Pi Catherine Rosangzuali, Winemaker, Hnahlan Winery chuan Technical Report a pe a. Hnahlan winery hi kum 2007 ah khan bultan niin Hnahlan leh a chhehvel khua ah te hian Bangalore blue grape variety an ching a. A tirah chuan fortified wine siam niin tun dinhmunah hian fermented wine Isabella an siam chhuak a. Kum 2019 khan grape quintal 480, 2020 ah quintal 630, kum 2021 ah quintal 500, kum 2022 ah quintal1500 leh kum 2023 ah quintal 989 lei in wine ah an siam chhuak a. Hnahlan Winery-ah hian fermentation tank 22 (11,000 litres theuh) awmin a capacity hi 2,42,000 litres a ni a, grape quintal 200 lenna cold storage an nei bawk a ni.
Kum 2019 -2023 chhunga Hnahlan Winery a grape hralh hnem ber te hnenah Farmers Award sem niin Pakhatna Pu C. Lalrampara, Pahnihna Pu C. Vanlalhriata leh Pathumna Pu V. Lalthlamuana te an ni. Pakhatna hian Citation leh Rs.5000/-, Pahnihna hian Citation leh Rs.4000/- leh Pathumna hian Citation leh Rs.3000/- a keng tel.
Pu Zirliantluanga, Secretary, HGFPCS chuan Secretary Report a pe a.Champhai DC Pu James Lalrinchhana, Pu C. Vanlalhriata, Chairman HGFPCS, Pu K.Zonunsanga District Horticulture Officer, Pu Vanlalvura Ralte, Asst Commissioner Excise & Narcotics, Pu Francis Sailo, Consultant HGFPCS, Brig Girish Upadhya, DIG 23rd sector Assam Rifles, Pu Jagdish Holkar, Chairman, All India Wine Producers Association ten thu tawi an sawi.
Vawiin Grape Escape ah hian Live Music, grape stomping, vineyard tour, cultural program, marathon leh program hrang hrang hlimawm tak hman a ni.
Source: DIPR