Ṭomir thla ni 1, 2026 (Zirtawpni)
"I nun dan hi sim teh, heti ringawt chuan ṭhian pawh kan kawm ngam lo va, inleng pawh kan hmuh zawh tawh loh hi," tia a farnuten an zilh hial, naupang tu pawh ṭap se, "Tuin nge vel che?" an tiha "Thangzachhinga'n" an tih ṭhin. Tleirawlte fuih pawrha insualtira, a chak lo zawk vel zui ṭhin; mi thinchhe tawpkhawk, a hnua mizia thlaka insiam ṭhat avanga Mizo zinga zaidam ber leh tlawmngai bera sawi tak, Vanapa (Thangzachhinga) thlan; Hnahlan ram, Tuiṭhoh lui kama awm, a tu chhuan la dam ten 2019-a a hriat rengna lung an phun tuai hnuma chei ṭhatna hun hman a ni a. He hun hi Vanapa thlan Sub-Committee member te leh Hnahlan leh a chheh vela NGO hruaitu hrang hrang ten an hmanpui.
He hun hi Pu Chawnglianmawia, President; Vanapa Thlan Sub-Committee chuan hneh takin a kaihruai a, Upa K. Khawremsiama, Hnahlan Branch YMA hruaitu hlun chuan hunserh a hmang.
Pu C. Lalmuanpuia, President; Hnahlan Joint YMA chuan thu sawiin, Vanapa thlan vawn nuna vawn him a nih theih nana a tu chhuan, tlang hrang hranga awmten an pu Vanapa thlan chei hnum tura tha leh zung, sum leh pai leh hun hlu tak an rawn sen avangin lawmthu a sawi. Pu C. Lalrintluanga, VCP; Hnahlan chuan, Vanapa thlan panna kawng sialna atana Department hrang hrang aṭanga puihna an dawn avanga lawmthu sawiin, Vanapa thlan leh a huam chhunga thing leh mau leh nungchate humhalh tlat a nih thu a sawi bawk.
Pu K. Thanngura, President; Vanapa Group YMA pawhin thu sawiin, Vanapa thlan hmun chungchanga inhnialna awm reng titawp tur leh a awmna hmun dik tak, an thlahtute aṭanga an inrochun tichiang lehzual tura hun hlu tak an rawn hman avangin lawmthu a sawi a. Vanapa thlan awmna hmun, khawvel tukverha pho chhuaktu, Pu C. Lalaudinga hmalakna leh thawhrimna avangin lawmthu a sawi a. Zoram mipui, ṭhang leh thar lo la awm zel tur ten Vanapa thlan awmna hmun dik tak chu Hnahlan ram, Tuiṭhoh lui kam a ni tih hria se a duh thu a sawi bawk.
Thangromawia Thomte-in Vanapa Hla, Pu Chawnglianmawia; Vanapa thlan Sub-Committee President ni mek hla phuah thiam takin a sa a. Pu Ramhmangaia, Vanapa thu chhuan zinga miin mikhual lo kalte (Ngopa leh NE Khawdungsei, Aizawl leh N. Delhi)aṭanga lo kal te) inhmelhriattirna hun a hmang a. Pu Hmingchungnunga, Mamtuka fapa, Vanapa tu chhuan kal zela inpui nghaktu chuan thu sawiin, a pa khan, Kelchawngi leh Chhura chanchin a sawi kar laka Vanapa chanchin a sawi ṭhin dan sawiin, Mizoram sah zau tuma Vanapa thil tih hrang hrang te a sawi a. A pa hnena Vanapa thlan awmna a zawha - "Hnahlan ram, Tuiṭhoh lui kamah a awm," tia a chhan thu leh Vana (Vanchiaua) thlan awmna erawh a hriat loh thua a chhan thu te, an thlahtuten an lo sawi ṭhin, an pu Vanapa thlan hmun ngei mita hmutu a nih avanga a lawmthu te nen ngaihnawm takin a sawi. Vanapa thlan hi hmun hrang hranga awm anga sawi ni mah se, anni chhungkua chuan Hnahlan ram, Tuiṭhoh lui kam a mi chauh hi an pawm a nih thu a sawi bawk.
Pu C. Ramhmangaia, Ngopa pawhin thu sawiin, Rabung (Zawlnghak)a Vanapa thlan awmna nia an sawi an laih ṭuma an kal dan leh thlan hlui ni awma ngaih an hmuh loh thu te leh an buai dan te sawiin, hmun hrang hranga an pu, Vanapa thlan awmna awm ni awma sawi awm ṭhin chuan a hlutzia a tilang niin a sawi a. An pu thlan awmna dik tak nia an hriatna hmuna a hriatrengna lung phun an nih dan a sawi. Pu C. Lawmkima, N. Delhi; Vanapa fapa Ralduha tuchhuan zinga miin thu sawiin, 1989-a Art & Culture Dept.-in Vanapa thlan awmna hriat an duh thu thuchhuah an neih avanga Tuiṭhoh lui kama an pu Vanapa thlan awmna zawn an tum, eng emaw avanga an ṭhulh leh tak dan aṭanga bul ṭanin thu a sawi a. Tun hmaa thua an lo sawi ṭhin, mit ngeia a hmuh avanga a lawm thu hnuk ulh ṭeuhin a sawi a. 2019-a Vanapa lung phunna huna a tel theih loh dan te pawh sawiin, an pu Vanapa hluta vawiin thlenga Hnahlan leh a chheh vel khuate thawhrimna leh inpekna avangin lawmthu a sawi. Pi Ramzauvi Chawngthu (Lapuii) Vanchiaua fapa, Aikila fate zinga miin thu sawiin, an faten an pu thlan awmna a hmun ngeia an hmuh theihna tura a fate a rawn hruai thu aṭanga ṭanin, chhungkaw intihhlimna satliah ve mai atana hun hman an tum laia Hnahlan khawtlangin an lo dawnsawn dana a lawm thu a sawi a, an chhungkaw thurochhiahin an pu Vanapa thlan awmna chu he lai hmun chiah hi a ni tiin a thusawi a khar a. Pi C. Duhveli, Vanchiauva tunu pawhin thu sawiin, Vanapa thlan humhalhna kawnga hma latute chungah lawmthu a sawi.
Thangzachhinga fapa Vanchiaua, Vanchiaua fapa Hranghleia, Hranghleia fapa Zumurha, Zumurha fapa Mamtuka, Mamtuka fapa C. Ṭhasiama Bawngkawn chuan thu sawiin, an thlahtute aṭanga an thu inhlan chhawn chu Tuiṭhoh lui kam hi an pu Vanapa thlan awmna a nih thu aṭanga bul ṭanin, Hnahlan Branch YMA Golden Jubilee lawm a nih ṭuma Vanapa thlan awmna a lo puan tawh thu te a sawi a. 2017-a Press Conference an neih ṭumah pawh Vanapa thlan awmna an tihchian tawh thu leh, a nem ngheh nama Decembe ni 5, 2019-a a thlan dik tak awmnaa lung an phun tak thu te ngaihnawm takin a sawi. "Vanapa thlan awmna hi Hnahlan ram, Tuiṭhoh lui kam a ni tih bak hi chu khawi hmunah mah ti chhuak tawh lo se tih hi kan chhungkua chuan kan duh a ni," tiin a thu sawi tlang a kawm.
Zing lama ruah sur avanga duh anga programme a hlawhtlin loh hlauhthawnawma a lan laia khaw ṭha tak hnuaia hun hman a nih tak nena inrem taka Thangromawia Thomte-in 'Fur khaw thiang' tih hla a sak chuan kal khawm te beng a fah hle.
Vanapa thlan awmna dik tak zawn chhuah leh nem ngheh a nih theih nana a bul aṭanga hma laa sul sutu leh a tawp thlenpuitu, Dr. C. Lalaudinga; Historian & writer chuan thu a sawi a. Hmun hrang hranga Vanapa thlan awmna sawi awm ṭhin avanga sorkar aṭang pawha development thil hrang hranga harsatna an tawh dan te a sawi a. Vanapa chanchin tlangpui leh a thih dan te, khaw chhunga phum a nih loh chhan te leh kal khawmte hriat atana thu beng lut tak tak a sawi bawk.
Upa K. Lalnunzira, Secretary; MUP, Hnahlan-in Pathian hnena ṭawngṭaina hun a hman zawhah programme tihtawp a ni a, puar leh tlai taka ruai ṭheh a ni.
Report petu: Lalduhsaka Hnamte