Vawiin October 1, 2024 (Thawhtanni) dar 10:30 am hian MUP, Hnahlan Branch chuan YMA Information Building-ah Khawvel pum huap Upate Ni vawi 32-na an hmang a. He hunah hian Pu H. Ginzalala, Champhai North MLA & Adviser to Chief Minister (Technical) chuan khuallian niin a hmanpui. Khual zahawm Pu Lalrintluanga, President MUP, Champhai District leh a thawhpuite bakah, Hnahlana NGO hrang hrang hruaitute leh Lungphunlian leh N. Diltlang Branch hruaitute'n an hmanpui bawk a ni.
Programme hi session 2-a hman a ni a. Chawhma hun hi Pu C. Thuamkunga, President chuan kaihruaiin; Pi C. Lalrinmuani'n tanna hun a hmang a. Pu Vanlalringa, Secretary hnen atangin kum 2023 October thla leh 2024 October thla inkara Branch chetchanna hrang hrang leh bungraw neih mek report ngaihthlak a ni.
Report pek zawh hian October 2023-2024 inkara MUP member boralte sunna hun hman niin, Pastor V. Lalmuanpuia, PCI chuan member boral 18-te sunna hun hmangin, tuna MUP member ni mekte tan fuihna thu tha tak tak a sawi bawk.
Khuallian- Pu H. Ginzalala, MLA Champhai North A/C & Adviser to Chief Minister ni bawk chuan kum upate hlutna hrang hrang sawiin, Kohhran, khawtlang leh ram roreltute hnenah an tawn hriat hlu tak tak hmangin thurawn pe thin turin a chah a. Hriselna chungchang pawh sawiin, kan hrisel loh chhan tam ber chu kan nun dan phung dik loh vang leh ei leh in lama kan taksa mamawh tawk tur kan ngaihtuah loh vang a nih thu a sawi.
Khuallian chuan upate chu an kum a lo tam tawh avanga an taksa a lo chak tawk tawh lohnate chu Pathianin mihringte a siam dan phung pangngai a nihna hre thar a, pawm thiam turin kal khawm upate chu a chah a ni. Khuallian Pu H. Ginzalala chuan MUP-te chu Rs. 40,000/- a pe a, hlim taka hun hmang turin duhsakna a hlan bawk.
Chawhma hun hman zawhah hian thingpui sen hang in niin, chhun chawlh neih a ni a. Chawhnu session hi dar 1:00 pm-ah tan leh a ni a, Pu Daldothanga, Vice President chuan a kaihruai a. He hunah hian Khual zahawm Pu Lalrintluanga, President, Champhai District MUP chuan thu sawiin, he hun hmang tura sawm an ni chu lawmawm a tih thu a sawi a. Hnahlan Branch MUP hnenah lawmpuina thilpek, pawisa fai a hlan nghal bawk.
Khual zahawm chuan Mizoram Upa Pawl chu January 4, 1957-ah din a nih thu sawiin, tuna hman mek khawvel pum huap upate ni hi UNO-in kum 1982 October 1-a upate ni atana a puan a nih thute a sawi a. Mizoramah District 11 awm mek zingah Upa pawl dinna hi District 8-ah a nih thu a sawi bawk.
Khual zahawm chuan MUP dinhmun tarlangin, tun dinhmunah Mizoramah MUP dinna District 8 awmin, Champhai District-ah Area 11 leh Branch 63 awmin, member 6790 (Mipa 3012 leh Hmeichhia 3778) niin, Hnahlan Area bikah Branch 7 a awm thu leh member 561 (mipa 270 leh hmeichhia (291) an awm mek a. Hnahlan bikah member 96 leh hmeichhia 130 an awm mek thu a sawi bawk.
Khual Zahawm chuan ram changkang apiangah upate an fin thu leh rawn an hlawh tih sawiin, keini pawhin tunlaina mila inher rem ve zel theih turin theihtawp chhuah a tul thu a sawi a, tar â ti-a min sawi mai loh nan tan kan lak reng a tul tih sawi bawkin, silhfen chungchangah pawh kan neih ang tawk tawk chu fai leh thianghlim taka inbel a tul thu a sawi a. Kan taksa leh inthuamna kawnga phak ang tawka kan thianghlim tawk loh chuan kan tu leh fate'n kan kianga awm an hreh a hlauhawm thu a sawi a. Faina ngaipawimawh zel turin a chah bawk.
Upate Ni-ah hian kum 80 tling chinte chawimawina hun hman niin, kum 80 tling chin mi 39 hnenah Rs. 50/- theuh pek an ni.
Upate Ni hmang tura mi sawmte hnen atangin thusawi tha tak tak ngaihthlak niin, Upa Pawlte tan thilpek an pe theuh bawk a. Pu Chindopianga'n thiam takin talhkuang vuain hla a rem thei bawk a ni.
Hun tawp kharnaah Pu H. Vanlaltlana, Treasurer hnen atangin sum report ngaihthlak a ni a. MUP tan sum tuaka inhlawhna a vân thin thu sawiin, Forest Department, Hnahlan R.O atanga tanpuina an hmuh thin thu leh an lawmzia thu a sawi a. Tun dinhmunah MUP building hmun 2-a mi thla tina luah man tlemte an lak ve thin bak sum lakluhna mumal a awm loh thute sawiin, an member boral an awmin raln Rs. 1000 an pek thin thu leh dam lo kanna Rs. 500 an pek thin thu sawiin, tunah hian sum balance Rs. 28,500 an neih mek thu report ngaihthlak a ni a. Upate ni hmang tura hun leh tha senga lo kal zawng zawngte chungah lawmthu a sawi a ni.
Vawiina Upate ni hmanna turah hian bawng talh niin, tlaiah ruai an buatsaihte tlai leh puar takin an kilho nghal a ni.
MUP Hnahlan Branch hi kum February 20, 1992 khan din niin, an President hmasa ber chu Pu Keiliana a ni a. A tir takah chuan Upa pawl hian hlut a hlawh lutuk lova. Member ni thei tura kum bithliah an siam kum 50 tling tawhte pawh khan a pawl leh thil tumte tha ti tak chungin Upa pawla han tel mai kha an hreh deuh roh zel a. Amaherawhchu, hun a kal hret hret a, member an pung tial tial a. Miten Upa pawla tel an hreh lo tulh tulh a. Tun dinhmunah chuan member pawh an pung nasa-in Upa pawl member ni thei kum 60 chin chu an tel deuh fur tawh a ni.
Report petu: Rothangpuia