Hnahlan khaw pasalṭha KC Lalmuana leh Seikunga

                                                                                                                             - Hrangchhuana Sailo,

                                                           Mac Donald Hill, Zarkawt, Aizawl. Contact No. 9436352280

Hnahlan khua hi grape chin uarna khua a nih vangin Mizorama grape khawpui pakhat nia hriat lar a ni awm e. Burma rami depa awm a nih avang hian sawrkar laipui tan pawh hriat loh theih loh a ni a, tun hnai deuhah phei kha chuan ramri himna tur atana duh duh tana kal pawh theih lohte pawh a nih hial kha.

HNAHLAN

Kum 1966-ah han tlan let daih ta ila. March ni 7, 1966-a khua a lo vàr chuan Sailo lal Saiṭhuama khua Hnahlan mipuite chuan leilung pian tirh ata thil rapthlak tak a tawng dawn tih hre loin dan pangngaiin hun an hmang leh mek a. Amaherawhchu, ni dang nen a inang dawn ta hauh lo mai.

Jet fighter-in Hnahlan khua a kâp dawn tih a hriat avangin 1st Bn. Assam Rifles, Hnahlana Jamadar Ganga Bahadur chuan Compounder Pu K.C. Lalmuana leh sipai pakhat Pu Seikunga te Hnahlan khaw chhungah a tir a. Khatih hun laia 1st Assam Rifles camp kha tuna Bethlehem lo ni ta, Hnahlan thlen hma kilometer 2 vela awm a ni.

Tichuan Pu K.C. Lalmuana leh Pu Seikunga te chuan an nunna thâpin 1st Assam Rifles camp aṭanga chhuakin hmanhmawh takin Hnahlan khuaah an tlan lut a, jet fighter-in a kap dawn tih an va hrilh ta a ni. Pu C. Lalaudinga sawi dan chuan, 04.03.1996 aṭang khan 1st Assam Riffles camp kha Mizo hnam sipaite khan an hual tawh a ni awm e. Tin, Pi Kaiṭhiangi w/o Pu K.C. Lalmuana sawi danin, dt. 06.03.1966 zana sipai camp aṭanga Hnahlan khaw lam an panna kawngah khan silai mu ni ngei tur rawn thlâwk sen fua fua an hmu bawk. A sawi zel danin, an pate khaw chhunga an luh khan volunteer-te awmna Primary School lam an pan nghal a, jet fighter-in khua a rawn kah/hâl tur thu an hrilh ta a ni. Anni chuan inpe tura lo tiin, lo hrên zui an tum ni awm tak a ni. Amaherawhchu, anni sipaite kha an himna tura thu rawn thlentu an ni tih an hriat hnuah an kaltir leh thei chauh a ni awm e.

Tichuan, khaw mipuite chu hmun him lama tlan chhuak turin an buai ta mup mup mai a. Volunteer ho an duty avang khan khaw chhuahsan kha a awlsam lem lo a ni awm e. Pu Thuammanga’n dt. 6.10.2021-a Hnahlan Welfare Whatsapp group-a a sawi danin, khami nia Khuangphah lama an tlanchhe tur pawh kha awlsam takin an chhuak mai thei lo a ni. Amaherawhchu, tlanchhiat ngai an ni tih an hriat chian hnuah mipui tam zawkte chu jet fighter-in an rawn kah/hâl hmain hmun him–ramhnuaiah leh laili phai leilet lamahte an insaseng hman ta a ni. Pu K.C. Lalmuana leh Pu Seikunga te khan an camp dai an thleng leh hman vel chiah tihah jet fighter pahnihin Hnahlan khua chu an rawn kap ta chiam mai a ni.

‘Documentary of Mizoram War of Independence 1966 to 1986’ tiha Pu C. Lalaudinga’n ‘Hnahlan Military Camp beih thu leh thlawhna kah Hnahlan 1st Assam Rifles post’ tiha a tarlan dan chuan, khatih lai khan Hnahlan kha in 223 vel niin, in 167 vel a kâng a, in 56 vel chiah a him a ni awm e. Tin, mi pathum an thi a, chungte chu–Thangkima s/o Ngulkhama, Lalruatthangi d/o Chawnlinga (fighter kahhlum) leh Thangvela s/o Chalrianga (kâng hlum) te an ni. Tin, Pi Lianṭhuami w/o Chhawnlinga chu bomb siperin a perna a bân ding lamah hliam a tuar a, Hrangzova’n a ngalrêkah puak chhawng siperin a perna hliam a tuar bawk a ni awm e.

Sailo lal Saithuama khua Hnahlan chuan ni 24.10.2024 aṭanga ni 26.10.2024 chhung khan Hnahlan kum 100+25 hlim takin a lawm a. Hnahlan khaw mipuite inrâlring miah lo lai kha jet fighter khan lo kap ta se, tam tak an thi ngeiin a rinawm a, kum 100+25 lawmnaa tel tam takte kha kan tel kher lo ang tih a rin theih mai awm e.

Pu K.C. Lalmuana hi Pi Kaithiangi, Hnahlan pasal a ni a, kum 15.08.2021 khan chatuan ram min pan san tawh a, an chenna Dinthar, Aizawlah vui a ni. He khawvelah awm tawh lo mah se, a hnathawh ropui tak, Hnahlan khaw tana a nunna thâpa a thil tih kha chawimawi tlak a va ni tehlul em. Tunah hian a nupui Pi Kaithiangite hi Dinthar, Aizawl a anmahniinah an cheng mek a ni.

Mizoram hian venghimtu pasalṭha Vanapa, Taitesena, Chawngbawla, Neuva leh mi dang tam tak a nei a; Hnahlan khua chuan ama pasalṭha K.C. Lalmuana a nei a ni. Pu K.C. Lalmuana hi a tirah Hnahlan makpa a ni a, Hnahlan chhandamtu Hnahlan pasalṭha ni lehin, Hnahlan khaw pa a ni zui ta a. Pu K.C. Lalmuana leh Pu Seikunga te hming hi Sailo lal Saiṭhuama khua a awm chhung chu a dai tawh ngai lo ang.

Pu Sappuithanga’n Hnahlan kum 100+25 lawmna atana a hlaphuah thunawn hian tlipna han siam ila a ṭha ang e:

Hnahlan khua Saiṭhuama khua kan ni kan hlim tlang za e,

Tlang tin leh mual tinah leng ṭhin mah ila;

Thinlung hmun khat pua pheilai vâwr siau siauin,

Suihlungrualte’n i pên zel ang.

- KC Lalmuana