VANAPA HLA
By Chawnglianmawia
1. Chhaktiang mawitu Lankhawpui hi,
Chhinlung naufa zaleng zingah,
Zonunpar mawi tivultu leh;
Tlawmngai hming thang mihrang zalna.
I sakhming reng a mawi hluan e,
Vanapa, aw Thangzachhinga,
Kan chawi zel dawn, kan hril zel dawn,
Ṭhang leh thar ten Zoram tluanah.
2. Laisuih tuah thiam chhui mite leh,
I tuchhuan chinlai lengte paw'n,
An hrilhfak e i lu nghahna;
Tuiṭhoh luikam puallawi ram hi.
3. Leng zawngte u thlir ve u maw,
Vangkhaw muantu chham ang zalna,
Suanglung dawhrem, lentu chawi vel;
Siahthing zar mawi ten an bawm e.
4. Tlawmngaihna leh huaisenna te,
Pipu nun mawi, zaidamna nen,
Zaleng zinga thangchhuah puitu;
Kan ngaisang che, kan chhuang ber che.
Hla phuahtu chanchin tawi:
He hla phuahtu hi 29 July, 1978-ah Pu C Nuntluanga leh Pi Lalchawii-te fa ni turin alo piang a. Zirna lamah M.A (Mizo) a ni. Tunah hian Hnahlan Higher Secondary School-ah Lecturer a ni mek. He hla hi 12.06.2019-a a phuah a ni.